Shqipëria në fillim të muajit të ardhshëm do të dalë në tregjet ndërkombëtare për të marrë 700 milionë euro borxh. Ministrja e Financave Delina Ibrahimaj u shpreh pas mbledhjes së qeverisë se dalja në treg do të bëhet në konsultim me këshilltarët për ta marrë normën më të përshtatshme të interesit.
“Projektvendimi i parë ka të bëjë me vlerën e eurobondit, që pritet që të dilet në treg në fillim të nëntorit do të ketë një vlerë 700 milionë euro. Procesi është duke u ndjekur nga Ministria e Financave dhe këshilltarët.
Dalja në treg nuk është vendosur si datë me qëllim që të dalim në ditët më të përshtatshme për të marrë normën më të përshtatshme të interesit” , shprehet Ibrahimaj.
Ndërkohë nga ana tjetër qeveria ka vendosur në dispozicion një grant prej 10 miliard lekësh në sajë të krizës energjetike për të mbrojtur fashën e abonentëve familjarë dhe biznesit të vogël.
Në fjalën e saj Ministrja e Energjisë dhe Infrastrukturës Belinda Balluku deklaroi se shqetësues është fakti që në treg ka mungesë të sasive energjike ndaj ky fond është i domosdoshëm për të përballuar këtë situatë .
“Dy grupe të energjisë dhe infrastrukturës. Një nga fushat më sensitive e prekur nga kriza globale është ajo e energjisë. Na duhet të punojmë çdo ditë. Sot është marrë vendimi për garancinë sovrane për të vënë në dispozicion të sektorit energjetik 10 mld lekë të cilat do të krijojnë kushte për të mbrojtur fashën e abonentëve familjarë dhe biznesit të vogël. Duhet të kemi parasysh që çmimet e larta globalisht sot janë një problem i madh. Na shqetëson mungesa e sasive energjetike në treg. Ajo që po bëjmë përmes akteve ligjore është krijimi i një mundësie për të siguruar këto sasi”, tha ministrja.
Balluku tha se dy projektvendime që kanë kaluar sot janë shpronësimet për dy linja që konsiderohen investime kritike, edhe pse investimet janë të ndaluara për OSHEE dhe OST.
