Shqipëria ka treguar karakter të fortë, duke marrë një pikë me shumë vlera, në garën kualifikuese për në Euro 2024.
Djemtë e Sylvinhos, arritën t’i bënin ballë “furisë çeke”, në shtëpinë e tyre, për më tepër duke rikuperuar disavantazhin e një goli, falë një perle të mesfushorit Nedim Bajrami.
Ky duel, ishte shumë i luftuar, me Çekinë që, ndryshe nga çfarë parashikohej, nuk pati një ndeshje të lehtë, ndaj miqve nga Ballkani.
Në pjesën e parë, kryefjala ishte mbrojtja, me të dy ekipet që u treguan shumë të sakta në prapavijë, duke mos lejuar që sulmet respektive të gjenin golin.
Me kalimin e kohës, kondicioni fizik i vendasve, bëri diferencën, me djemtë e Skuravit që krijuan shumë raste për gol, megjithatë nuk kishin precizionin e duhur për të gjetur golin.
Në pjesën e dytë, muzika nuk ndryshoi, me çekët që kërkuan golin më shumë se kundërshtari. Në minutën e 56’, pas golit të anulluar nga VAR, vendasit zhbllokuan shifrat falë Çernit, duke përfituar nga përgjumja e mbrojtjes mike.
Ky rezultat u duk se e mbylli ndeshjen, me Shqipërinë që nuk po krijonte rrezikshëmri te porta çeke, por një perlë e Nedim Bajramit, në minutën e 66’, barazoi shifrat duke shtangur tifozët vendas.
Nga ky moment, “skemat u prishën”, me të dyja ekipet që filluan të sulmonin në kërkim të golit të dytë. Megjithatë, pas disa rasteve të mira të humbura nga të dy ekipet, ekipet u ndanë në “paqe”, duke marrë nga një pikë.
Çekia vazhdon të kryesojë në grupin E, me 8 pikë, e ndjekur nga ballkanasit me 7.
Ky ishte barazimi i parë, në historinë e përballjeve mes dy skuadrave.
Discussion about this post