Shqipëria do të ndeshet sot në orën 20:45 në ‘Air Albania’ për takimin e fundit kualifikues të Botërorit ‘Katar 2022’.
Kombëtarja jonë e ka humbur tashmë çdo mundësi për të vazhduar në fazën e ‘Play-off’, teksa ndeshja me Anglinë e cila u mbyll me rezultatin shkatërrues 5-0 për ‘Tre Luanët’, duke shuar ëndrrën e ‘Kuqezinjve’.
Në ndeshjen e sotme Shqipëria synon që t’i mbyllë këto kualifikuese me 18 pikë për herë të parë në histori.
Ndonëse Andora shihet si një ekip i dobët i duhet dhënë vëmendje maksimale në mënyrë që të mos humbet mundësia e pikëve rekord.
Skuadra që do të kemi përballë renditet në vendin e pestë të grupit me vetëm 6 pikë, ndërsa Shqipëria është e treta me 15 pikë deri më tani.
Në këtë takim ‘Kuqezinjtë’ vijnë me shumë mungesa për shkak të dëmtimeve, kartonëve, por së fundmi është mësuar edhe për shkak të pakënaqësive me trajnerin Edoardo Reja.
Armando Broja duket se nuk dëshiron të grumbullohet më me Kombëtaren për aq kohë sa në krye të stolit do të jetë tekniku italian. Kjo pakënaqësi e lojtarit ka ardhur për shkak se ai është lënë në tribunë në ndeshjen me Anglinë si dhe në stol në shumë takime të tjera.
Një humbje e madhe kjo për Kombëtaren nëse talenti i sulmit nuk do të bashkohet më me skuadrën tonë, duke ditur se në çdo moment që ai ka hyrë në fushë ka bërë diferencën./K.T/Gijotina.com
Discussion about this post