Shqipëria në “flakë”, IGJEUM: Ja qarqet me rrezikshmërinë më të lartë

IGJEUM përmes rrjeteve sociale bën të ditur se Tirana e Fieri janë qarqet me rrezikun më të lartë nga zjarret, kjo për shkak edhe të temperaturave të larta që kanë dominuar gjatë këtyre ditëve.

“Sot pasdite (e diel, dt.03) dhe nesër (e hënë, dt.04) pritet nivel rreziku “I LARTË’’ në qarkun e Tiranës dhe Fierit, ndërsa në qarqet e tjerë pritet rrezik “I MODERUAR’’ (siç tregohet në tabelë, respektivisht për secilin qark).

Në disa qarqe pritet rrezik “I LARTË” në zona të lokalizuara, konkretisht: qarku Shkodër (Perëndim dhe Jug), Kukës (Qendër), Dibër (Perëndim), Lezhë (Qendër), Elbasan (Perëndim), Berat (Perëndim), Vlorë (Veri) dhe Gjirokastër (Qendër).

Rreziku pritet të jetë më i lartë gjatë ditës së sotme”, thuhet në parashikimin e IGJEUM.

Ndërkohë lidhur me motin, IGJEUM parashikon se sot pasdite (e diel, dt.03) dhe nesër (e hënë, dt.04) priten reshje të dobëta në shumicën e qarqeve (siç tregohet në tabelë, respektivisht për secilin qark).

Nesër temperaturat minimale dhe maksimale të ajrit pritet të arrijnë: në bregdet: 25 / 33 °C, në vendet e ulëta: 22 / 35 °C, në vendet malore: 16 / 29 °C”, njofton IGJEUM.