Ka kaluar rreth një javë nga lajmi se në Shqipëri do të strehohet grupi i parë i afganëve që po evakuuohen nga Kabuli, dhe ende asnjë shenjë prej tyre. Mësohet se, fillimisht vendi ynë do të presë një total prej 120 afganësh që do të nisen nga aeroporti i Egjiptit dhe do të vijnë në aeroportin e Tiranës.
Kryeministri Edi Rama ka thënë më herët se në grupin e parë që do të vijnë do të ketë kryesish gra, fëmijë dhe mbështetës të perëndimit. Në Rinas tashmë prej ditësh janë ngritur disa çadra ushtarake ku ka staf mjekësor, forca ushtarake dhe psikologë për të pritur afganët, për t’u bërë një kontroll për gjendjen e tyre shëndetësore dhe psikologjike.
Më pas do të bëhet edhe identifikimi i tyre, për t’u regjistruar më pas edhe në sistemin TIMS. Afganët do të transportohen me autobusë nën shoqërinë e Forcave të Rendit dhe të Ushtrisë, së bashku me një ambulancë ku dhe do të akomodohen në hotelin në Berat, konviktet në Tiranë dhe në hotelet e përcaktuara në Durrës. Atyre do u bëhen vizita të detajuara, përfshirë tamponi si edhe do të shihen se kush është vaksinuar.
Në qytetin Studenti në Tiranë janë gati godinat 2, 4, 7, 8, 24 dhe 25. Këto godina janë zbrazur tashmë nga studentët që po qëndronin aktualisht në këto ndërtesa dhe po bëhen funksionale për strehimin e të huajve. Gjithashtu, mësohet se, të gjithë afganët që do të vinë në Shqipëri, pritet të kalojnë në skanerin e SHISH dhe antiterrorist shqiptarë. /Gijotina.com
