Shqipëria njeh rivalët, FSHF mirëpret ndeshjet e Grupit A

në Sport

Kohë leximi: 2 min

Është hedhur këtë të enjte shorti i kompeticionit të UEFA-s “Regions’ Cup” 2024-25, për futbollin amator për të përcaktuar grupet për raundin para-eliminator dhe të ndërmjetëm ku merr pjesë për herë të parë edhe Shqipëria.

Kombëtarja shqiptare do të jetë pjesë e grupit A të raundit para-eliminator, së bashku me Armeninë e Estoninë, ndërsa lajmi tjetër i mirë është se të treja ekipet kanë rënë dakord që ndeshjet e këtij grupi do të zhvillohet në Shqipëri nën organizimin e Federatës Shqiptare të Futbollit.

Nëse arrin të kalojë këtë raund Shqipëria është shortuar në Grupin 5 të raundit të ndërmjetëm, ku do të ketë përballë Çekinë, Bosnje Hercegovinën dhe Skocinë.

Ndeshja e parë pritet të luhet më 20 maj, kurse të gjitha ndeshjet e raundit para-eliminator duhet të luhen deri më 31 korrik 2024. Kalendari ndërkohë do të përcaktohet menjëherë nga UEFA.

Të gjitha ndeshjet e raundit të ndërmjetëm duhet të luhen përpara datës 6 dhjetor 2024. Tetë fituesit e grupeve të raundit të ndërmjetëm do të kualifikohen për në finale – që do të zhvillohen, në parim, në dy javët e para të qershorit ose korrikut 2025.

Në këtë kompeticion marrin pjesë 36 ekipe kombëtare, ku 30 prej tyre do të nisin garën në raundin e ndërmjetëm ndërsa 6 të tjerat ku bën pjesë edhe Shqipëria do të marrin pjesë në raundin para-eliminator për të plotësuar dy vendet e mbetura të raundit të ndërmjetëm; ekipi që siguron vendin e parë në grupin A dhe ekipi që renditet i pari në grupin B.

Në raundin e ndërmjetëm do të marrin pjesë 32 skuadra (30 që hyjnë direkt në këtë raund dhe dy fituesit e raundit para-eliminator) që do të ndahen në katër vazo me nga tetë skuadra bazuar në koeficientët e tyre. Ekipet do të ndahen në tetë grupe me nga katër, secili me një ekip nga çdo vazo.

Futbolli amator është zhvilluar shumë vitet e fundit përmes kompeticioneve të ndryshme të organizuara nga FSHF, si Sunday League apo kampionati i futbollit 5×5. Për këtë arsye, FSHF vendosi të krijojë një ekip kombëtar dhe të marrë pjesë në turneun e organizuar nga UEFA.