Qeveria e vendit tonë ka ngritur një grup pune i cili analizon buxhetin e shtetit në mënyrë për të përballuar humbjet, ndërsa në anën tjetër bëhet me dije se në vijim mund të ketë dhe një rritje të çmimit të energjisë, lidhur kjo edhe me rritjen e çmimit blerës. Aktualisht vlera për megavat, llogaritet më tepër se 200 euro.
Këtë të enjte çmimi në bursë ka arritur një shifër rekord 270 euro për megavat, teksa mesatarisht ka qenë nga 20 deri në 60 euro.
Sipas informacioneve nga INSTAT, vendi ynë ka pasur rritje të prodhimit të energjisë elektrike në gjashtëmujorin e parë të këtij viti 4,8 milionë megavat orë, por sërish pa mundur të mbulojë dot kërkesën ndaj i është drejtuar importit.
Në 8 muaj janë blerë 213 mijë megavat orë, ndërsa vetëm në muajin prill bëhet fjalë për 49 mijë megavat.
Bilancet e bëra për 5 vitet e fundit tregojnë se vendi ynë ka dalë “i humbur” pasi çmimi blerjes ka qenë më i lartë se ai i shitjes. Gjithashtu, në vitin 2018 kur vendi ynë kishte tepricë energjie, rezulton me deficit 10 mln euro.
E njëjta situatë është edhe për sa i përket këtij viti, OSHEE e ka shitur energjinë disa herë më pak nga vlera e blerjes, konkretisht vlera e importit ka arritur vlerën 99 mln euro, ndërsa ajo e shitjes 8 mln euro.
Në bazë të informacioneve, partneri më i madh tregtar me të cilin vendi ynë shkëmben energji mbetet Serbia.
