Shqipëria e ka nisur mirë kampionatin Botëror të boksit që po zhvillohet në Beograd të Serbisë. Suksesi është arritur nga Alban Beqiri i cili shkëlqeu me performancën e tij në ndeshjen e parë në paraeliminatoret për kategorinë e peshave deri në 71 kg.
Boksieri shqiptar fitoi duelin ndaj rivalit kenian Boniface Maine ku ishte dukshëm superior në të tria raundet. Me këtë sukses boksieri shqiptar preu biletën për në raundin e dytë ku të premten do të përballen me përfaqësuesin e Lituanisë.
Duhet theksuar se Beqiri ka lënë gjurmë jo vetëm në arenën kombëtare por edhe jashtë kufijve të Shqipërisë ku është shpallur edhe kampion Ballkani. Ai ka zhvilluar edhe katër duele në boksin profesionist ku i ka fituar të gjitha.
