Ministria e Mbrojtjes ka informuar mbi situatën e zjarreve në vend gjatë 24 orëve të fundit, duke bërë të ditur se janë regjistruar 19 vatra zjarri në total, nga të cilat 6 prej tyre janë ende aktive në orët e para të ditës së sotme.
Vatrat e zjarrit u evidentuan në disa bashki të vendit, konkretisht në Finiq, Vlorë, Elbasan, Poliçan, Berat, Has, Bulqizë, Malësi e Madhe, Lezhë, Kolonjë, Korçë, Tiranë, Kavajë dhe Fier.
Aktualisht, vatrat aktive sipas MM, janë:
- Elbasan: Në vendgrumbullimin e mbetjeve, ku vijon puna për shuarjen e plotë pas izolimit të vatrës nga forcat operacionale.
- Finiq: Në zonën midis fshatit Grazhdan dhe Malçan, ku forcat e MZSH dhe efektivat e Forcave të Armatosura kanë monitoruar situatën gjatë natës. Zjarri është ende aktiv në zonën lindore të fshatit Leshinicë e Poshtme, por larg zonës së banuar.
- Vlorë: Në vendin e quajtur “Sotiran”, ndërmjet fshatrave Tragjas dhe Dukat, zjarri vazhdon të jetë aktiv në tri vatra të shpërndara. Terreni i vështirëson ndërhyrjet, por zjarri nuk paraqet rrezik për zonën.
- Poliçan: Në fshatin Zgërbonjë, ku vatra e zjarrit u mbajt në monitorim gjatë natës dhe sot ka rifilluar puna për shuarjen e plotë të saj. Sipas informacioneve paraprake nga shërbimi pyjor, deri dje janë përfshirë rreth 50 hektarë.
- Bulqizë: Në vendin e quajtur “Livadhi i Peladhisë”, ku gjatë natës, për shkak të erës dhe temperaturave të larta, vatra e zjarrit është shtrirë drejt “Malit të Bardhë”. Forcat operacionale janë në terren për shuarjen.
- Malësi e Madhe: Në vendin e quajtur “Bjeshkët e Parrusë”, pati një riaktivizim të vatrës së zjarrit. Forcat e MZSH, bashkiake, të shërbimit pyjor dhe vullnetarët ndodhen në terren.
Si pasojë e zjarreve, kryesisht në sipërfaqe me pemë, shkurre e barishte, janë djegur rreth 65 hektarë me bimësi. Në operacionet e shuarjes u angazhuan 37 automjete zjarrfikëse, 362 forca operacionale dhe 8 automjete të rënda, nërsa forcat e Armatosura kontribuan me 104 efektivë dhe mjete të tjera, bën me dije njoftimi.
Bazuar në parashikimet e Institutit të Gjeoshkencave, sot pritet nivel rrezik “I LARTË” në pothuajse të gjitha qarqet. Në qarkun e Durrësit pritet nivel rrezik “I MODERUAR” dhe lokalisht rrezik “I LARTË” në zona të caktuara në jug të qarkut.
Ministria e Mbrojtjes u bën thirrje qytetarëve të tregojnë përgjegjësi maksimale, të mos ndezin zjarre në ambiente të hapura, të mos djegin mbeturina, të shmangin çdo veprim që mund të shkaktojë zjarr dhe të njoftojnë në kohë autoritetet vendore.
Discussion about this post