Shqipëria vijon të digjet, 9 vatra zjarri aktive

Flakët e zjarrit vijojnë të djegin bimësinë në vend, teksa aktualisht raportohet për 9 vatra zjarri ende aktive.

Sipas të dhënave nga Qendra Kombëtare Operacionale e Emergjencave Civile gjatë, 24 orëve të fundit janë raportuar 27 vatra zjarri, nga të cilat 18 janë shuar.

Vijojnë të jenë aktive ditën e sotme vatra e zjarrit midis fshatit Kakarriqit, njësia administrative Balldren dhe fshatit Gjadër, njësia administrative Dajç, bashkia Lezhë, zjarri në fshatin Zavaline, bashkia Elbasan.

Në njësinë administrative Gostimë, bashkia Elbasan po punohet për shuarjen e një tjetër vatre. Ekipet e emergjencave vijojnë punën për shuarjen e vatrave edhe në zonën pyjore Bode, bashkia Maliq, në fshatin Kus, bashkia Tiranë, në fshatin Mushnik, bashkia Rrogozhinë, në fshatin Vorfë, bashkia Malësi e Madhe, në fshatin Salari, bashkia Tepelenë si dhe në parkun kombëtar Qafshtamë, bashkia Krujë.

Aktualisht vatrat nuk paraqesin rrezik për zona të banuara, vlerësojnë Emergjencat Civile. Sipas të nëjjtave burime, në operacionet për shuarjen e zjarreve në 24 orët e fundit janë angazhuar 599 forca operacionale dhe 452 mjete.