Rreth 3.6 milionë shqiptarë kanë sot të drejtën e votës për të zgjedhur forcën politike që do të qeverisë Shqipërinë katër vitet e ardhshme. Tre ditë para zgjedhjeve, Komisioni Qendror i Zgjedhjeve ka dërguar në 92 Komisione Zonale të Administrimit të Zgjedhjeve (KZAZ) materialet zgjedhore. KZAZ-ja, jo më vonë se 15 orë para hapjes së votimit, shpërndan materialet zgjedhore tek Komisionet e Qendrave të Votimit (KQV), ku përfshihen kutinë me materialet zgjedhore, kutitë e votimit, lista e zgjedhësve, dhomat e fshehta, vulat me kodet e sigurisë etj. KZAZ-të dhe KQV-të kanë nga 7 anëtarë, të propozuar nga PS, PD dhe LSI. Në gjysmën e tyre PS-ja ka shumicën, pra 4 anëtarë, në gjysmën tjetër PD-LSI kanë shumicën.
Zgjedhjet vendore administrohen nga një organizëm me tre nivele për administrimin e zgjedhjeve, që përbëhet nga një KQZ, 66 KZAZ dhe 4,932 Komisione të Qendrave të Votimit (KQV). Numërimi do të bëhet në 66 Qendra të Numërimit të Votave (QNV), një për çdo Zonë të Administrimit Zgjedhor.
Në zgjedhjet e 25 prillit, do votohen 16 parti politike ku në gare janë 140 kandidatë me 12 zona zgjedhore. Proçesi i votimit do të jetë si çdo vit përveç Njësisë nr.10.
Në Njësinë Nr. 10 në kryeqytet ku do të aplikohet si identifikimi elektronik, ashtu edhe votimi e numërimi elektronik, votuesi paraqitet vetëm me mjetin e identifikimit biometrik.
Ai kalon kartën e identitetit te pajisja e identifikimit elektroni dhe në këtë moment, në ekranin që ndodhet përpara komisionerëve të qendrës së votimit, shfaqet një foto e votuesit, e cila nuk është e njëjtë me foton e kartës së identitetit.
Nëse komisionerët konfirmojnë që personi që ka kaluar mjetin e identifikimit te pajisja është i njëjtë me personin që paraqitet në qendrën e votimit, atëherë votuesit i jepet mundësia që me shenjën e gishtit të firmosë atë që quhet fleta e votimit.
Aparatura do të printojë një letër që mban edhe firmën me shenjat e gishtërinjve të votuesit, që e dorëzon te komisionerët dhe më pas drejtohet për në dhomën sekrete të votimit, ku në Njësinë 10 në Tiranë do të jetë një pajisje që do bëhet votimi elektronik.
VOTIMI
Pasi dorëzon te komisioneri kuponin e printuar nga makineria e identifikimit elektronik, komisioneri i jep akses votuesit që të votojë te pajisja. Në ekranin e pajisjes do të shfaqen logot e partive me emërtimin e tyre dhe në krah të tyre një rreth i vogël ku do duhet të prekin votuesit.
Pasi shtyp rrethin e partisë së preferuar, votuesi do duhet më pas të shtypë në ekran në vendin ku lexohet “Konfirmo”.
Pas këtij hapi, në ekran do të shfaqen numrat, që nënkuptojnë kandidatët e partisë së zgjedhur në atë qark. Votuesi do të përzgjedhë kandidatin e preferuar përmes numrit dhe do të shtypë sërish verifiko dhe pret derisa votimi konfirmohet.
