Një ngjarje e rëndë është shënuar në zonën e Bournias, në rajonin e Messinia në Greqi, ku një shtetas shqiptar është gjetur i vdekur brenda një stalle.
Sipas të dhënave paraprake, viktima, 44 vjeç, është konstatuar me një plagë në kokë të shkaktuar nga armë zjarri, që dyshohet të jetë një pushkë gjuetie. Megjithatë, arma nuk është gjetur në vendin e ngjarjes, çka sipas autoriteteve po vështirëson hetimet.
Ishin dy persona, një 47-vjeçar shqiptar dhe një grua greke rreth 50 vjeç, ata që zbuluan trupin dhe njoftuan menjëherë policinë. Të dy janë marrë në pyetje nga autoritetet, ndërsa hetimet janë përqendruar edhe te rrethi i njohjeve të viktimës.
Burime bëjnë me dije se gjithsej tre persona janë shoqëruar për t’u marrë në pyetje, përfshirë edhe bashkatdhetarin e viktimës, i cili dyshohet të jetë i implikuar në krim.
Policia ka rrethuar zonën dhe po zhvillon kontrolle, ndërkohë që po analizohen edhe pamjet nga kamerat e sigurisë në bizneset përreth për të hedhur dritë mbi atë që ka ndodhur.
Hetimet vijojnë, ndërsa autoritetet pritet të zbardhin më shumë detaje në vijim.
Discussion about this post