Një 55-vjeçar me origjinë shqiptare ka mbetur i plagosur pas një sulmi me armë zjarri në orët e para të mëngjesit të së hënës, në zonën e Patisias në Athinë. Ngjarja ka ndodhur pak para orës 05:00, në kryqëzimin e rrugëve Vroutou dhe Themou Anninou, sipas raportimeve të mediave greke.
Eduart Mullaj, 55 vjec nga Delvina, rezulton të jetë personi i plagosur.
Sipas policisë greke, i plagosuri është shprehur se dy personat që e qëlluan me armë, po tentonin të vidhin motorin e tij dhe për këtë arsye dhe hapën zjarr.
Megjithatë policia duket se nuk është e bindur me deklaratën e 55-vjeçarit dhe dyshon se motivet janë të tjera.
Sikurse raportohet, dy persona, të cilët lëviznin me një motoçikletë, i janë afruar 55-vjeçarit, teksa po dilte nga banesa dhe kanë qëlluar në drejtim të tij. Si pasojë e të shtënave, shqiptari ka marrë plagë në gjymtyrët e poshtme.
Pas sulmit, autorët janë larguar nga vendi i ngjarjes. I plagosuri është transportuar me ambulancë në spitalin “Georgios Gennimatas”, ku ka marrë ndihmën mjekësore.
Në vendngjarje kanë mbërritur forcat e policisë, të cilat kanë sekuestruar tre gëzhoja dhe një plumb, si prova materiale. Autoritetet greke kanë nisur hetimet për zbardhjen e plotë të rrethanave të sulmit dhe identifikimin e dy autorëve.
Discussion about this post