Shqiptarët e arrestuar në Britani: Më mirë në burg, se në Shqipëri

Autoritetet britanike kanë arrestuar katër shqiptarë në një shtëpi bari për kultivimin e kanabisit.

Shtetasit shqiptarë të identifikuar si Runi Firaku, Drillon Sulaj, Andi Zyberaj dhe Ermir Zyberaj u arrestuan gjatë një aksioni policor në Kent, në muajin gusht të këtij viti.

Runi Firaku, 43-vjeç, kishte vetëm pesë ditë brenda banesës, pasi kishte mbërritur legalisht në Britani më 5 gusht, raportojnë mediat britanike .

Ata u gjetën teksa kultivonin 347 bimë kanabisi, që nëse do të hidheshin të treg, do të kapnin vlerën e 260 mijë paund.

Prokurori Timothy Devlin tha në sallën e gjyqit për njërin nga të arrestuarit: “Kur u pyet nga policia nëse e dinte se ishte e paligjshme rritja e këtyre bimëve, ai tha ‘burgu është më mirë se Shqipëria’”.

Ata mohuan të kishin njohje me njëri-tjetrin dhe thanë se ishin transportuar ilegalisht në Britani, në pjesën e pasme të një furgoni. Para gjykatësit, avokatët mbrojtës thanë se shqiptarët ishin nën presion për t’i shlyer borxhin trafikantëve. Ata u dënuan me 7 dhe 8 muaj burg.

Avokati i Sulaj, 32-vjeç, Kerry Waite, tha se ishte ‘vënë nën presion’ për të shlyer borxhin e tij prej 20 mijë paund ndaj kontrabandës së njerëzve që kishte organizuar hyrjen e tij të paligjshme në Britani në mars të këtij viti.

Ndërsa, Andi Zyberaj, 35-vjeç dhe Ermir Zyberaj, 32-vjeç, të cilët nuk kanë lidhje me njëri-tjetrin, ishin kontrabanduar gjithashtu në Britani, ku njëri kishte hipur në pjesën e pasme të një furgoni, ndërsa tjetri me kamion, të cilët jetonin në Luton.

Gjykata u tha se Ermir Zyberaj po shlyente një borxh prej 50 mijë eurosh, por nuk u tha nëse kjo ka të bëjë edhe me kontrabandën e personave.