Qindra qytetarë të Kosovës kanë mbërritur që në orët e para të mëngjesit në vendin tonë, për të qenë pjesë e festimeve të festave të Pavarësisë dhe Çlirimit. Në pikën kufitare të Morinës, policia ka shtuar sportelet dhe janë 7 të tilla që shërbejnë për të shmangur radhët.
Qytetarët shprehen se ka zgjatur shumë pak procedura në kufi, edhe pas porosive të lëna dje nga kryeministri shqiptar Edi Rama dhe ai i Kosovës Albin Kurti, të cilët kërkuan lehtësimin e procedurave.
Qytetarët e Kosovës shprehen se këto masa janë të vonuara dhe nuk ka nevojë që të ketë kufij mes dy shteteve. Sa i takon masave anticovid ato mbeten në fuqi, ku qytetarët duhet të paraqesin ose pasaportën e vaksinimit, testin negativ që të jetë kryer në 72 orët e fundit, ose dëshmi që e kanë kaluar Covid në 6 muajt e fundit. Këto masa vlejnë njësoj në të dyja anët e kufirit.
“Gjithçka ka qenë në rregull në doganë, do të shkojmë për pushime në Tiranë për festa”, tha një shqiptar i Kosovës që po udhëtonte drejt Shqipërisë.
Ditën e djeshme në Elbasan u zhvillua mbledhja e dy qeverive. Në fjalën e tij kryeministri i Shqipërisë, foli për marrëveshjet e nënshkruara duke nënvizuar lëvizjen e lirë në kufi, pa kontrolle fizike, por vetëm me kamera.
Discussion about this post