Partitë shqiptare në Maqedoninë e Veriut do të jenë kundërshtarë në dy kampet më të mëdha politike për zgjedhjet lokale në Maqedoninë e Veriut. Ziadin Sela i Aleancës për Shqiptarët dhe Afrim Gashi i Alternativës lidhën sot koalicionin me kryetarin Hristjan Mickoski të VMRO-DPMNE.
Ata do të sfidojnë LSDM-në e Zaevit dhe BDI-në e Ali Ahmetit që përveçse qeverisin, kanë dhe një marrëveshje koalicioni për zgjedhjet lokale. Me ta është bashkuar dhe Menduh Thaçi. Bashkëpunimi mes partive opozitare nënkupton se në disa komuna do të ketë marrëveshje për të kandiduar vetëm njëra palë një kandidat dhe të mbështetet nga të gjitha, kurse tek të tjerat të gjitha partitë të kenë kandidatë.
NJOFTIMI NGA ALEANCA PËR SHQIPTARËT
Bashkëpunimi i opozitës kundër korrupsionit
Sot, në zyrën e deputetëve të koalicionit Aleanca për Shqiptarët & Alternativa u zhvillua një takim mes partive opozitare në vendin tonë, në prag të zgjedhjeve lokale.
Ishin kryetarët e Aleancës për Shqiptarët, Ziadin Sela dhe kryetari i Alternativës, Afrim Gashi, të cilët e pritën në takim kryetarin e VMRO-DPMNE-së, Hristjan Mickoski.
Tema e këtij takimi ishin zgjedhjet e ardhshme lokale dhe mundësia për bashkëpunim opozitar midis këtyre partive, me motiv kryesor luftën kundër krimit dhe korrupsionit në komunat e udhëhequra nga LSDM-BDI.
Tre kryetarët vunë në dukje se duke u nisur nga raporti i Transparency International, sipas të cilit Maqedonia renditet në vendin e 111-të, vend ky më i keqi deri tani, bashkëpunimi i opozitës është i pashmangshëm, në mënyrë që njësitë e vetëqeverisjes lokale të çlirohen nga qeverisja korruptive, nga harxhimi jotransparent i të hollave të qytetarëve dhe keqpërdorimi i pushtetit nga qeverisja LSDM-BDI në të gjitha nivelet e qeverisjes.
Prandaj, konstatuan ata, është e nevojshme të bashkëpunohet në mënyrë që komunat të jenë institucione në shërbim të qytetarëve, me zhvillim lokal të fortë dhe të barabartë ekonomik, me mbështetje buxhetore për decentralizimin në fushat e arsimit, kulturës dhe sportit, si dhe me përpjekje më të mëdha për të qenë komuna të gjelbërta të cilat do të sigurojnë ajër të pastër dhe do të mbrojnë mjedisin jetësor.
Për të artikuluar më mirë zërin opozitar si dhe për të përfaqësuar sa më mirë interesat e të gjithë qytetarëve në nivel lokal, tre kryetarët, duke theksuar këto parime, vendosën për bashkëpunim dhe mbështetje reciproke të kandidatëve për kryetarë komunash. Bashkëpunimi do të thotë që partitë e përmendura nuk do të kandidojnë për kryetar komune në komuna të caktuara dhe do të mbështesin njëra-tjetrën, ndërsa në komunat e tjera do të konkurrojnë me të gjitha partitë e tjera.
Mënyra dhe detajet e bashkëpunimit do të bien dakord nga degët komunale të tre palëve.
Qendra e Komunikimit e:
VMRO-DPMNE
Aleanca për Shqiptarët
AlternAtivA
Shkup, 27.08.2021
