Radhë të gjata janë regjistruar në dalje në pikën e kalimit kufitar të Kapshticës ditën e sotme që përkon me festën e Pavarësisë.
Referuar raportimeve të qytetarëve radhët arrijnë deri në 1 km, ndërsa drejtuesit e mjeteve kanë pritur deri në 90 minuta për të kaluar kufirin dhe festuar festat e Nëntorit në Greqi. Për të përshpejtuar kalimin, policia kufitare ka vendosur procedura të përshpejtuara dhe sportele shtesë për shtetasit shqiptarë me dokumente greke, si dhe për shtetasit e huaj.
Edhe pala greke ka shtuar sportelet për të përpunuar më shpejt dokumentet e shqiptarëve që hyjnë në vendin e tyre. Në afërsi të pikës kufitare dhe tokës neutrale, radhët kanë shkuar deri në 4 korsi për shkak të fluksit të madh.
Ndërkohë nga ana tjetër, mijëra shqiptarë kanë kaluar së fundmi kufirin e Morinës për të hyrë në vend dhe për të festuar 28 Nëntorin, ditën e flamurit kombëtar. Shumica kanë përdorur automjete private, por edhe autobusë.
Qyteti më i preferuar për festimet mbetet Vlora, ndërsa udhëtarët kanë planifikuar të vizitojnë edhe qytete të tjera për të përkujtuar këtë datë të shënuar.
Sipas të dhënave zyrtare, gjatë 24 orëve të fundit në pikën kufitare të Morinës janë futur 64 autobusë, ndërsa në total kanë hyrë 17,789 shtetas dhe 4,651 automjete.
Discussion about this post