Shqiptarët janë të përçarë në zgjedhjet që po mbahen këtë të dielë në Serbi. “Beteja politike e shqiptarëve vazhdon – Shaip Kamberi” udhëhiqet nga Shaip Kamberi, ndërsa “Alternativa Demokratike Shqiptare-Lugina e Bashkuar”, nga Shqiprim Arifi.
Arifi ka deklaruar në Preshevë për gazetaren e ABC News, Linda Karadaku, se përçarja ka ardhur nga kryeministri i Kosovës, Albin Kurti.
“Përçarja ka dy vite në Preshevë, kjo me mbështetjen e Albin Kurtit, na e ka sjellë Kurti. Në vitin 2020 e kemi pasur listën e unifikuar, në dy vitet e fundit kemi qenë të përçarë”, theksoi ai.
Ndërkaq, Avni Aliti, Sekretar i Komisionit Qendror të Zgjedhjeve për Preshevën, tha se nuk ka interes të qytetarëve shqiptarë për të marrë pjesë në votime.
“Votimi ka filluar që në orën 07:00, me përjashtim të një vendvotimi. Votimet janë sikur herët e tjera, qytetarët nuk kanë pasur interes për zgjedhjet parlamentare. Kemi të njëjtën situatë dhe atmosferë. Duke pasur parasysh ikjen e qytetarëve nga Presheva drejt vendeve perëndimore, këtu është rrudhur numri i qytetarëve. Po të kishim një listë, besoj se do të kishim më shumë votues”, nënvizoi Aliti.
Discussion about this post