Përfaqësues nga Shqipëria, Kosova, Maqedonia e Veriut, Mali i Zi, Lugina e Preshevës, diaspora dhe komunitetet arbëreshe në Itali janë mbledhur në Kalabri, në një aktivitet që ndërthur kulturën, trashëgiminë, identitetin dhe bashkëpunimin mes hapësirave shqiptare.
Në kuadër të Forumit të Përhershëm të Turizmit Rajonal, që zhvillohet nga 18 deri më 20 shtator në komunat arbëreshe të Kalabrisë, Unioni i Bashkive Shqiptare në Rajon ka mbledhur rreth 60 përfaqësues nga trevat shqiptare dhe diaspora.
Trashëgimia arbëreshe në fokus
Forumi i kushtohet potencialit të trashëgimisë arbëreshe si një urë lidhëse për zhvillimin e turizmit, kulturës dhe bashkëpunimit ekonomik.
Gjuha, veshjet tradicionale, gastronomia, muzika, ritualet dhe zakonet e ruajtura ndër breza janë pjesë e aktiviteteve të zhvilluara gjatë takimit.
Organizatorët synojnë që kjo trashëgimi të mos mbetet vetëm pjesë e kujtesës historike, por të shërbejë edhe si pikënisje për projekte të reja në fushën e turizmit, kulturës, rinisë dhe industrive kreative.
Mesazhi “Liri për çlirimtarët”
Përtej axhendës kulturore dhe turistike, takimi mori edhe një dimension solidariteti me Kosovën.
Përfaqësuesit e komunave arbëreshe dhe delegatët nga trevat shqiptare përcollën mesazhin “Liri për çlirimtarët”, në një kohë kur në Kosovë vijon debati rreth zhvillimeve gjyqësore në Hagë ndaj ish-krerëve dhe pjesëtarëve të Ushtrisë Çlirimtare të Kosovës.
Në tokën arbëreshe, ku komunitetet shqiptare kanë ruajtur gjuhën dhe identitetin ndër shekuj, takimi në Kalabri përcolli kështu dy mesazhe: ruajtjen e trashëgimisë së përbashkët shqiptare dhe solidaritetin me Kosovën.
Discussion about this post