Shqiptarët po përdorin gjithmonë e më pak makina manuale

Automjetet me kamio automatike po bëhen gjithnjë e më të popullarizuara në Shqipëri, megjithatë, veturat me kamio manuale ende dominojnë tregun.

Aktualisht, 56.2% e automjeteve që përdorin shqiptarët janë me kamio manuale, në krahasim me ato me kamio automatike ose gjysmë automatike që përfaqësojnë 43.8%. Megjithatë, në vitet e fundit, kjo diferencë po zvogëlohet dhe pritet që shumë shpejt, automjetet automatike të bëhen më të zakonshmet.

Sipas të dhënave nga Drejtoria e Përgjithshme e Transportit Rrugor, në vitin 2024, u regjistruan 99 441 automjete në Shqipëri, ku 66% ishin me kamio automatike dhe vetëm 33% me kamio manuale.

Në vitet 2019 dhe 2020, ishin regjistruar më shumë automjete me kamio manuale, por që nga viti 2021, ka pasur një ndryshim të dukshëm, me automjetet automatike që kanë marrë prioritet në regjistrimet e reja, dhe kjo tendencë pritet të vazhdojë edhe gjatë këtij viti.

Në Shqipëri, aktualisht janë rreth 959 mijë automjete që qarkullojnë.