Ngjarja me këngën e prezantimit që Hysaj këndoi në ekipin e Lacios, nuk është e para për të cilën shqiptarët vihen në qendër të vëmendjes. Sigurisht, më së shumti te Lacio. Ndoshta është edhe krejt rastësi, që kjo ngjarje të jetë e radhës ku kuqezinjtë vihen nën vëzhgimin e një lupe të stërmadhe.
Për çdo veprim që bëjnë, për çdo postim në rrjetet sociale që bëjnë dhe për çdo sjellje të tyren te Lacio, që nga Tare, te portieri Strakosha, te Muriqi e së fundmi te Hysaj, lupa e vëzhgimit dhe kritika, janë jashtëzakonisht më të mëdha në raport me të gjithë të tjerët.
Ndoshta, kjo është edhe vetëm e rastësishme dhe pjesë e rutinës së përditshme të ngjarjeve dhe lajmeve që publikohen ditë pas dite. Më herët ka qenë drejtori Tare, i cili është analizuar me detaje, ashtu siç edhe portieri Strakosha.
Për dy shqiptarët e Lacios, numrat flasin qartë si për drejtorin që ka bërë afrime të jashtëzakonshme dhe të leverdishme për Lacion me lojtarë si Milinkoviç-Saviç & Co, ashtu edhe për portierin, i cili vjet u la në stol, edhe pse statistikat e tij ishin dukshëm më të mira sesa të Pepe Reinës në katërkëndëshin e Lacios.
