Pasuria e një shqiptari të rritur për vitin 2021, raportohet të jetë rreth 35.5 mijë dollarë, sipas raportit të Credit Suisse. Por, nga kjo shifër vetëm 5.4 mijë janë pasuri financiare dhe pjesa tjetër janë pasuri të paluajtshme. Kjo pasuri është gjashtë fishuar nga ajo e vitit 2000, kur CS ka nisur krahasimet dhe pasuria e një shqiptari raportohej 6.6 mijë dollarë. Vlera mesatare e pasurisë për një të rritur ishte 17.6 mijë dollarë në 2021-shin.
Nga viti 2020 pasuria financiare e shqiptarëve është rritur me 850 dollarë dhe ajo e pronave me rreth 5 mijë dollarë.
Në total, po për vitin 2021, pasuria e individëve kap vlerën e 78 mld dollarëve. Në raport me PBB-në botërore, ajo përbën vetëm 0.02%. PBB-ja për frymë vlerësohet të jetë 8.2 mijë dollarë. Vlera e borxhit për një shqiptar vitin e shkuar, ishte mbi 1 mijë dollarë. Shqipëria vazhdon të konsiderohet një vend me të ardhura mesatare dhe kategorizohet i varfër.
Matjet e bankës zvicerane tregojnë se më shumë se gjysma e shqiptarëve, 55.5% kanë pasuri nga 10.000 deri në 100.000 dollarë. 6.4% e tyre kanë 100.000 deri në 1 mln dollarë dhe vetëm 0.1% kanë mbi 1 mln dollarë. Pjesa tjetër kanë pasuri nën vlerën e 10 mijë dollarëve.
Pasuria globale raportohet në 463.6 trilionë dollarë dhe pasuria mesatare e një të rrituri në botë fiksohet pranë 87.463 dollarëve, disaherë më e lartë se ajo e shqiptarëve.
Discussion about this post