Shqiptari e kishte kthyer lokalin në Gjermani në bazë të “Ndranghetës”, ja çfarë zbuluan përgjimet

Një megaoperacion i autoriteteve italiane, gjermane dhe belge ka çuar në pranga disa trafikantë ndërkombëtarë droge, mes tyre edhe shqiptarë, që ishin në bashkëpunim me klanet mafioze kalabreze, “Ndrangheta”.

Mes 25 urdhër-arresteve të lëshuara me urdhër të Prokurorisë italiane, pjesa më e madhe janë shqiptarë me banim në Belgjikë, mes tyre edhe Fisnik Smajlaj, i shpallur në kërkim që prej vitit 2008.

Mediat italiane shkruajnë se lokali i këtij të fundit “Dino” në Frankfurt, Gjermani, ishte kthyer në një bazë të mafies kalabreze, “Ndrangheta” dhe veprimtarisë së tyre kriminale.

Në lokalin në pronësi të shqiptarit kopsiteshin pazaret e kokainës mes trafikantëve. Policia gjermane ka përgjuar një takim që kishte për objekt blerjen e 50 kilogramëve kokainë, e cila nga Amerika e Jugut kishte mbërritur në Gjermani dhe më në fund do trafikohej në Itali për t’u shitur me doza.

“Është pothuajse një klishe: biznesi i klaneve ‘Ndrangheta në Gjermani në një mënyrë ose në një tjetër kalon nëpër një piceri. Për klanin Forastefano – i bazuar në Sibaritide dhe projeksionet ndërkombëtare në Evropë – vendi “Dino” në Frankfurt është një vend i mirë për takime dhe një pikëmbështetje për mbështetjen logjistike «të koriglianezëve kur ata shkuan në Gjermani për të diskutuar mbi bizneset e paligjshme”.

Pikërisht në Gjermani ka “lindur” hetimi “Gentleman 2”. Dhe këtu jeton Rosario Giovanni Fuoco, i konsideruar nga magjistratët e antimafia si një nga menaxherët së bashku me Claudio Franco Cardamone. Dy ndërmjetës që sipas prokurorisë duket se janë “të integruar plotësisht në panoramën e trafikut ndërkombëtar të drogës”.

Anti-mafia italiane zbuloi se ishin trafikuar rreth 3 tonë drogë, kokainë e heroinë me vlerë mbi 45 milionë euro.

Nga operacioni “Gentleman”, autoritetet identifikuan 34 persona të përfshirë në trafikimin e drogës, mes të cilëve edhe shumë shqiptarë. Policia ekzekutoi masa ndalimi ndaj:

Gazmend Alliu, 37 vjeç;

Ledio Hajdini, 24 vjeç;

Dilaver Hajdini, 33 vjeç;

Zigur Hametaj, 27 vjeç;

Zamir Oruçi, 36 vjec;

Klodja Paza 36 vjeç;

Fisnik Smajlaj, 41 vjeç;

Ilir Ulqinaku 39 vjeç;

Arben Zela, 32 vjeç.