Pothuajse një vit zgjati hetimi nga Karabinierët e Njësisë Hetimore të Komandës Provinciale të Riminit, të cilët së bashku me kolegët nga Bellaria mbyllën “rrethin” pas hetimeve për sekuestrimin e mbi 22 kilogramëve drogë.
Hetimi kishte nisur më 19 janar 2022, kur në Bellaria, efektivët e Policisë kishin kryer një operacion blic në një apartament në qytet, ku një 38-vjeçar shqiptar kishte grumbulluar 14 kilogramë kokainë dhe 8.5 kilogramë hashash. Hetuesit kishin dyshuar që në fillim se shqiptari i paidentifikuar me emër nga mediat italiane, i cili kishte një dosje të pastër, ishte trafikant droge.
Vazhdimi i hetimeve dhe falë një sërë përgjimesh që i janë bërë 38-vjeçarit në kohën kur ai ishte në burg, i ka mundësuar hetuesve të përvijojnë një panoramë më të plotë të historisë, duke u kthyer kështu tek një bashkatdhetar i tij, 32 vjeç.
Ky i fundit duket se ka përdorur 38-vjeçarin si një “kukull”, duke organizuar takime dhe dërgesat të ndryshme për të marrë ose shitur drogën në mënyrë që të mos shfaqej kurrë personalisht. Por duket se nuk ia doli që të fshihej.
Discussion about this post