Shqiptari përdorej “si mashë”, policia greke sekuestron 77 kg drogë

Policia greke ka sekuestruar rreth 70 pako me drogë, me peshë 77 kg e 320 gramë marijuanë në Igumenicë, në kufirin shqiptaro-grek.

Operacioni është zhvilluar nga policia greke që ka pikasur mjetin e dyshimtë me shoferin shqiptar. Pas ndalimit për kontroll, shqiptari ka kundërshtuar efektivët, por më pas në bagazhin e mjetit janë gjetur thasët me drogë.

I pyetur prej agjentëve ai pranoi se lëndën narkotike do ta dërgonte në Athinë ku edhe do të paguhej për transportimin e saj. Policia thotë se vlera e drogës llogaritet në më shumë se 190.000 euro.

Ndërsa një tjetër sasi prej 300 kg kanabis u gjet në zonën kufitare në konen e Kozanit. Sipas policisë lokale, sasia e drogës ishte fshehur në një kamionçinë e cila rezulton e vjedhur në zonën e Athinës. Drejtuesi i saj mundi të largohet sapo vuri re se po ndiqej prej agjentëve të policisë.