Shtatë gola të shënuar, Barça përmbys Vilarealin

Barcelona ka fituar një ndeshje spektakolare në udhëtim te Vilarreal me rezultat 3-4.

Ka qenë një duel i jashtëzakonshëm mes dy skuadrave, ku filloi shumë më mirë për mysafirët që realizuan dy gola të shpejtë brenda tre minutave.

Gavi hapi serinë e golave në minutën e 12-të pas një asistimi nga Yamal, derisa tre minuta më vonë Frenkie de Jong realizoi për 0-2.

Vendasit u rikthyen në lojë gjatë pjesës së parë, kur Foyth fillimisht realizoi në minutën e 26-të për 1-2.

Sulmuesi norvegjez Sorloth u gjend bukur pas asistimit nga Pedraza dhe realizoi për 2-2 pesë minuta para fundit të pjesës së parë.

Pjesa e dytë nisi më mirë për vendasit, të cilët vetëm pas pesë minutave, Baena realizoi për epërsinë e parë të vendasve 3-2.

Megjithatë katalanasit nuk u dorëzuan dhe në minutën e 68-të ishte Ferran Torres që realizoi pas dy tentimeve të njëpasnjëshme për 3-3.

Tre minuta më vonë në skenë doli Robert Lewandoëski ku pas një gjuajtje të fortë të Yamal topi goditi shtyllën dhe nga kthimi i tij Leva shënoi për 3-4. Deri në fund Barcelona u mbrojt mirë dhe mori një fitore të madhe në një terren të vështirë si ai i Estadio de la Ceramica.