Emri i saj është Hina dhe peshon tre kilogramë, ajo është vajza e parë refugjate afgane e lindur në spitalin Sulmona të Italisë nga një grua afgane 32-vjeçare.
Mediat italianë shkruajnë se historia e saj është dramatike pasi bashkëshorti thuhet se u qëllua nga talebanët para se të ikte nga Kabuli. Nëna, Bibi Arezu, e cila nuk flet italisht, u ndihmua nga një ndërmjetës kulturor i pranishëm në dhomën e lindjes.
“Nuk ishte një lindje e lehtë, veçanërisht sepse duhej të koordinoheshim me ndërmjetësuesin kulturor. Por në fund të gjithë u prekëm”, u shpreh mjeku që ndoqi lindjen.
Para se të dërgohej në Itali, 32-vjeçarja pa shtëpinë e saj të djegur nga talebanët ku si të mos mjaftonte kjo burri i saj u vra nga ekstremistët pikërisht para saj në aeroportin në Kabul. Burri u akuzua se ishte bashkëpunëtor i forcave të huaja.
