Institucionet shqiptare shpesh herë kanë dështuar në mbrojtjen e qytetarëve nga rreziqet e ndryshme. Me dijeninë e tyre janë krijuar monopole, është bërë korrupsion dhe më e rënda përpara syve të shtetit janë bërë vrasje dhe për këtë gjë është heshtur.
Rasti i fundit, i vrasjes së të miturit Fatjon Bici në Gramsh nga bashkëmoshatarët e tij ishte një sirenë alarmi për këdo që ka veshë për të dëgjuar.
Përtej kritikave për keq edukim nga familja, pikëpyetja e madhe që ngrihet është po shkolla, pse nuk po arrin ti edukojë? Më tej skandali më i madh është se si mundet një shtet të lejoj të shiten si pa të keq armë të ftohta rëndomtë nëpër dyqane fizike apo online kryesisht.
Thika e doreza hekuri shiten onile
Të pajisesh me një armë të ftohtë në Shqipëri është vetëm një telefonatë ose një mesazh larg. Me dhjetëra faqe online në Facebook, Instagram, Google apo tashmë dhe në TikTok shesin online armë të ftohta.
Siç edhe vihet re në fotografitë e mësipërme, mjafton një kërkim në Google për të gjetur më dhjetëra produkte të ndaluara dhe që fatkeqësisht marrin jetë në vend.
Çmimet e thikave, dorezave të hekurit apo shkollave të gomës janë qesharake dhe të përballueshme edhe nga adoleshentët. Dorezat e hekurit shiten online me çmim 1000 deri në 2500 lekë, ndërsa thikat janë më pak të kushtueshme çmimet e të cilave varjojnë nga 500 deri në 1500 lekë. Pak më të shtrenjta janë shkopinjtë e gomës.
Tregtimi i këtyre mjeteve të rrezikshme bëhet në sy të të gjitha institucioneve dhe asnjë prej tyre nuk merr masa, deri në momentin që ndodh vepra penale, që rrezikon jetën e qytetarëve pa dallim moshe dhe që fatkeqësisht sjell edhe humbje të jetës.
Inspektoriati i Mbikqyrjes së Tregut asnjë reagim
Teksa i gjithë shteti duhet të ngrihet në këmbë për të shkuar deri në fund të zinxhirit me ndëshkimin e personave që po vrasin jetë në vend, siç janë edhe tregtarët e këtyre mjeteve vdekjeprurëse, ai zgjedh të hesht.
Jemi mësuar që në çdo prag feste Inspektoriati i Mbikëqyrjes së Tregut, zhvillon një aksion për asgjësimin e lodrave për fëmijë, por asnjëherë nuk kemi dëgjuar për një aksion për të ndaluar tregtimin e armëve të ftohta.
Prej disa ditësh ky institucion që ka për qëllim mbrojtjen e konsumatorëve, merret me qeset plastike njëpërdorimshe, me urdhër të ministrive sepse cenohet mjedisi, por nuk ka bërë asnjë reagim për këtë shkelje flagrante të ligjit ku armët shiten sheshit, pa pyetur se kujt i shiten, një fëmije, adoleshenti apo një të rrituri.
Fatkeqësisht në Shqipëri jemi mësuar që shteti të reagoi kur situata shkon në pikën më të zezë, dhe nuk bën asgjë për të parandaluar.
Ligji shkelet me të dyja këmbët!
Një nga ligjet themelore të një shteti, në Shqipëri shkelet në mënyrë flagrante dhe askush nuk flet e asnjë nuk mban përgjegjësi.
Në nenin 279 të Kodit Penal është e shkruar e zeza mbi të bardhë që ndalohet shitja e këtyre mjeteve të rrezikshme. Ndëshkohet prodhimi dhe mbajtja e tyre pa leje të organeve kompetente.
“Prodhimi, mbajtja, blerja apo shitja, e armëve të ftohta si shpatat, bajonetat, thikat dhe mjete të tjera të përgatitura e të destinuara posaçërisht për sulm kundër personave ose për vetëmbrojtje, pa lejen e organeve kompetente, dënohen me gjobë ose me burgim deri në tre vjet”, thuhet në Kodin Penal.
Pyetja që ngrihet në këtë pikë është,- “A kanë marrë leje të gjitha faqet online për shitjen e këtyre produkteve? Nëse shteti do të funksiononte këto biznese do të ishin po aq fajtore sa edhe vetë përdoruesit e armëve të ftohta, po aq fajtorë sa edhe vrasësit.
Shifra rekord krimi me armë të ftohta
Më shumë se 700 vepra penale për mbajtjen e armëve të ftohta janë regjistruar në të gjithë vendin në 5 vitet e fundit. Rekordi u regjistrua në vitin e shkuar kur i regjistruan 230 vepra penale.
“Nga të dhënat statistikore në vitin 2022 vërehet tendenca në rritje prej 17,95 % e procedimeve të regjistruara për veprën penale të parashikuar nga neni 279 i Kodit Penal “Prodhimi dhe mbajtja pa leje e armëve të ftohta”, në krahasim me vitin 2021″, thuhet në raportin e Prokurorit të Përgjithshëm mbi gjendjen e kriminalitetit në vend.
Ky fenomen që po zgjerohet çdo vit e më shumë kërkon masa të ashpra parandaluese. Të dhënat e Prokurorisë së Përgjithshme tregojnë qartë situatën shqetësuese në të cilën ndodhet rendi dhe siguria në vendin tonë.
Discussion about this post