E ftuar në emisionin “Opinion”, ministrja e Kulturës Elva Margariti tha se menaxhimi i parkut të Butrintit nuk do të jetë një formë koncesioni. Margariti tha se shteti shqiptar është palë në këtë menaxhim dhe se Ministria e Kulturës është anëtare e bordit.
“Absolutisht nuk është asnjë formë koncensioni. Shteti shqiptar është palë në krijimin e një fondacioni bashkë me partnerin që është Fondi Shqiptaro-Amerikan i Zhvillimit. Ligji për trashëgiminë i njeh të drejtët shtetit për të menaxhuar sitet e veta nëpërmjet një organizate dhe është një OJF. Të dy partnerët vendosin fondet e tyre. Butrinti ka një fond të akumuluar prej gati 10 vjetësh, 2.1 milionë dollarë. Ndërkohë partneri vendos pak më shumë se 5 milionë dhe këto arrijnë të çojnë përpara një plan biznesi për 10 vjet” – tha Margariti.
Por ditën e sotme Kontrolli i Lartë i Shtetit dha një tjetër këndvështrim. Në Raportin mbi ‘Efektivitetin e Politikave për ruajtjen e parqeve arkeologjike’, të publikuar në Prill 2021, KLSH e konsideron Marrëveshjen ndërmjet Ministrisë së Kulturës dhe Fondit Shqiptaro-Amerikan për Zhvillim një koncesion. Në një nga rekomandimet e Raportit të Kontrollit të Lartë të Shtetit, thuhet: ‘Bordi i Parkut Kombëtar Butrint dhe AADF, të cilit i është dhënë me koncesion shërbimi i biletarisë së Parkut, të vlerësojnë dhe të marrin masa për rritjen e numrit të sporteleve të biletarisë’. Diferenca mes termave ‘Marrëveshje’ dhe Koncesion’ është shumë e madhe.
Discussion about this post