Zv.kryeministri dhe njëkohësisht ministri i Rindërtimit, Arben Ahmetaj ka bërë me dije se ditën e sotme janë kaluar një sërë vendimesh lidhur me procesin e rindërtimit të shtëpive të dëmtuara nga tërmeti. Ai deklaroi se nga 28 miliardë lekë fondi i rindërtimit ka shkuar në 35 miliardë lekë, duke u shtuar kështu me 7 miliardë lekë. Sipas Ahmetaj kjo shtesë në fond vjen si nevojë e përshpejtimit të rindërtimit të shtëpive që edhe pse kanë kaluar më shumë se dy vite nga tërmeti i 26 nëntorit, ende nuk kanë marrë strehën e tyre.
“Reflektimin e të gjithë vendimeve, sot kaluan një grup vendimesh për rindërtimin të cilat bëjnë avancim të kosiderueshëm të financimit për Bashkinë e Tiranës dhe për të 10 bashkitë e tjera. Llogaria e rindërtimit pra gjithë fondi i rindërtimit kalon nga 28 miliardë lekë në 35 miliardë lekë. Avancimi është bërë për të përshpejtuar të gjitha proceset e rindërtimit, për të kthyer në shtëpitë e tyre apo në shtëpitë e reja të rindërtuar amë fortë më moderne të gjithë qytetarët që në 2019, 26 nëntor u detyruan të largoheshin si nga shtëpia dhe nga institucionet. 350 milion dollarë nga 280 milionë dollare me të njëjtën logjikë për të përshpejtuar rikthimin e familjeve në shtëpi. Gjithandej do kemi një numër të kosiderueshëm familjesh që do kthehen në shtëpitë e tyre pas gati 2 vitesh”, tha Ahmetaj.
Aktualisht janë rreth 1400 familje që kanë marrë çelësat e shtëpive të rindërtuara në Tiranë, Durrës, Laç, Shijak apo Bubq, ndërkohë që Ministria e Rindërtimit ka planifikuar të ndërtojë në total 11 mijë apartamente e 4 mijë shtëpi individuale, ndërsa do të rikonstruktohen 37 mijë banesa, 168 shkolla, kopshte e çerdhe.
Nga këto 2500 banesa individuale sipas kryeministrit Rama do të ndërtoheshin nga buxheti i shtetit me 60 milionë dollarë, por mesa duket ky fond nuk mjafton për ndërtimin e tyre në kohë.
“Brenda marsit të vitit të ardhshëm ne besojmë të arrijmë në 2500 banesa individuale të financuara po nga buxheti i shtetit me 60 milionë dollar” tha Rama në 3 nëntor 2020.
Discussion about this post