Uzuni i bashkohet edhe dy lojtarëve të tjerë të dëmtuar, Sokol Cikalleshit dhe Ardian Ismajlit, të tre janë në dyshin për sfidën e 12 tetorit kundër Republikës Çeke.
Dhe telashet s’kanë të sosur… Duket se kjo shprehje i shkon për shkak asaj që po ndodh me trajnerin e Kombëtares shqiptare,
Silvinjo, i cili padyshim duhet të jetë i shqetësuar pas asaj që ka parë të enjten në mbrëmje, në ndeshjen midis Granadës dhe Real Betisit, në takimin e vlefshëm për javën e 7-të të Kampionatit Spanjoll të Futbollit.
Sulmuesi Myrto Uzuni, ka lënë fushën e lojës për shkak dëmtimi që në pjesën e parë, duke shtuar problemet për trajneri kuqezi.
Përtej faktit që kishte shfaqur probleme fizike në ndeshjet e kaluara, Uzuni u aktivizua edhe të enjten si titullar nga trajneri Pako Lopez, për të tentuar që të kthente skuadrën në shinat e duhura në një ndeshje delikate dhe për ta larguar nga zona e ftohtë e renditjes. Por në minutën e 36-të të ndeshjes, pas një kontakti me kundërshtarin, sulmuesi shqiptar u rrëzua në tokë dhe menjëherë tregoi se kishte probleme muskulore.
Pasi fizioterapistët hynë në fushë, kërkuan zëvendësimin e lojtarit i cili doli dhe u ul në stol. Një shqetësim tjetër ky për kuqezinjtë, vetëm dy javë para ndeshjes ndaj Republikës Çeke, aty ku padyshim luhet fati i kualifikimit të Shqipërisë për në Evropian.
Me Uzunin që shfaq probleme e me Cikalleshin e dëmtuar, për trajnerin Silvinjo tashmë mund të duhet që të mendojë ndryshime në repartin e sulmit, pasi lojtarët e mësipërm mund të mos jenë në 100% të formës së tyre kur të nisë grumbullimi i kuqezinjve.
Uzuni, Cikalleshi dhe Ardian Ismajli, janë tre lojtarët e vënë në dyshin për sfidën e 12 tetorit kundër Republikës Çeke.
Discussion about this post