Shtrëngim masash për festa, Manastirliu: Nuk ndalemi derisa të vaksinohen të gjithë

Ministrja e e Shëndetësisë, Ogerta Manastirliu gjatë një vizite në Kukës është pyetur mbi përforcimet e masave kufizuese gjatë festave të fundvitit. Manastirliu u shpreh se lidhur me këtë duhet bërë një rivlerësim i të gjithë indikatorëve, teksa shtoi se një vendim i tillë duhet të merrët nga Komiteti i Ekspertëve. Sipas Manastirliut, arma që qytetarët kanë për mbrojtjen e imunitetit të tyre është vaksinimi, ndërsa theksoi se lidhur me variantin e ri “Omircon” po pritet informacion nga ndërkombëtarët, rreth rrezikshmërinë që ky mutacion mbart.

“Dua të them që vendimet merren nga komiteti i ekspertëve. Situata po ndiqet në mënyrë dinamike. Duhet të jemi të kujdesshëm për masat duke rivlerësuar masat që kemi. Esenciale është vaksinimi si armë që kemi kundër virusit apo edhe varianteve që qarkullojnë siç është edhe Omircon. Priten informacione nga institucionet ndërkombëtare për të parë sa i rrezikshëm është ai. Vaksina është arma që ne kemi. Jemi sot këtu edhe për të vijuar fushatën e vaksinimit duke synuar që vaksinimi të shtrihet sa më shumë te të rinjtë.”

Manastirliu theksoi se qeveria nuk do të ndalet derisa çdo qytetar të jetë i mbrojtur përmes vaksinimit, teksa shtoi se situata paraqitet e qëndrueshme.

“Shqipëria ka një mbulesë vaksinale që po rritet dita ditës. Është situatë e qëndrueshme e vaksinimit në Shqipëri. Ne nuk do të ndalemi derisa çdo qytetar të jetë i mbrojtur përmes vaksinimit. Fushata e vaksinimit ka disa nivele të operimit. Jemi në një nivel të ri. Prej disa muajsh jemi derë më derë për qytetarët që nuk kanë mundur të shkojnë për t’u vaksinuar. Shëndeti qëndron në majë. Qeveria shqiptare ka siguruar dozat e vaksinave për popullatën dhe ne po ecim me hapa të qëndrueshëm”, tha ajo.

Në kuadër të 16 ditëve të fushatës kundër dhunës me bazë gjinore, Manastirliu u ndal të fliste për këtë temë, ku shprehu se do të punohet me pushtetin vendor për parandalimin e këtij fenomeni.

“Sot në kuadër të 16 ditëve të aktivizmit për dhunën me bazë gjinore jemi në Kukës për të bashkuar zëri me aktorët, komunitetet dhe bashkinë si bashkëpunëtor në luftën kundër dhunës. Puna jonë ndahet në aspekte të parandalimit të këtyre fenomeneve duke përfshirë edhe ngritjen e qendrave sociale. Ministria ka bërë të mundur ngritjen e 30 shërbimeve sociale në të gjitha bashkitë. Do vazhdojmë të ngremë shërbime sociale”, u shpreh Manastirliu.