Ministrja e Ekonomisë dhe Inovacionit, Delina Ibrahimaj, deklaroi në një konferencë për shtyp se javët e fundit është vërejtur një rritje e çmimeve për disa produkte të shportës bazë.
Ajo bëri të ditur se institucionet do të intensifikojnë monitorimin në terren, përmes ngritjes së grupeve të posaçme që do të verifikojnë në baza ditore luhatjet e çmimeve. Sipas saj, çdo masë e mundshme do të fokusohet pikërisht tek këto produkte.
“Po monitorojnë një shportë me 80 ushqime, në bazë ditore. Kanë filluar të reflektohen çmime të rritura në disa prej produkteve të shportës. Për këtë arsye, siç e thashë do të aktivizojmë një ekip, disa grupe monitorimi nga Inspektoriati Shtetëror i Mbikëqyrjes së Tregut për të verifikuar këto çmime pasi kemi zgjedhur me INSTAT këtë listë produktesh. Do të dalim në terren për të monitoruar çmimet dhe reflektimin e furnizimet me realitetin e çmimeve.
Nëse do të marrim vendime në të ardhmen do të merren vendime që lidhen me shportën bazë, me rritjen e përgjithshme të çmimeve të konsumit. Në vitin 2022 ngritëm një bord për ushqimet, e vështirë që këtu të bëjmë të njëjtin mekanizëm si te karburantet se format dhe mënyrat e importit të ushqimeve. Produktesh e shportës kanë shumëllojshmëri të mënyrave të importimit apo tregtimit. Masa për të mbrojtur edhe shtresat në nevojë”, tha Ibrahimaj.
Ibrahimaj tha gjithashtu se qeveria nuk mund të ndërhyjë drejtpërdrejt në çmimet e produkteve ushqimore, ndryshe nga rasti i karburanteve, për shkak të kompleksitetit të tregut.
“Unë nuk thashë që ne do të ndërhymë në çmime. Madje e shpjegova pse nuk bëjmë dot të njëjtën mekanizëm që aplikuam tek karburantet, sepse është e pamundur të ndërhymë në çmime. Ajo që unë thashë është që ne jemi duke monitoruar në bazë ditore, dhe do dalim për të verifikuar që këto çmime nuk janë abuzive. Thashë që në rast se do kemi një ndikim të vazhdueshëm në çmimet e konsumit, do të suportojmë shtresat që nuk përballojnë dot kostot.”, shtoi ministrja.
Discussion about this post