Nga 1 Nëntori çdo qytetar që përdor linjën e transportit urban Kamëz -Tiranë do të përballet me çmime të rritura të biletës dhe aboneve. Sipas burimeve nga VNA çmimi i biletës do nga 40 lekë bëhet 50 lekë, ndërsa aboneja nga 1200 lekë që është aktualisht do kushtojë 1400 lekë.
Operatori i linjës ka kërkuar Drejtorisë së Transportit në bashkinë Kamëz, një kërkesë për rritje tarife, me analizë të kostove, me arsyetimin se janë rritur kudo çmimet.
Bashkia e Rakip Sulit ka përgatitur relacion teknik dhe financiar për justifikimin e ndryshimit.
Propozimi është shqyrtuar nga komisionet në këshill bashkiak (ekonomia, financat, transporti).
Dhe Këshilli Bashkiak ka votuar për miratimin e tarifës së re.
Për banorët e Kamzës, rritja e çmimit është e pajustifikueshme.
“Nuk ka as kushte, dje kur erdhëm poshtë, pavarësisht rritjes së çmimit, mund të kenë qenë në autobus 300 veta”-thotë një qytetar.
Ndërsa pensionistët janë ata më të indinjuarit nga kjo rritje çmimi.
“1o lekë, por shtrenjtë është“; “50 dhe 50, janë shumë, çoj një bukë në shtëpi“, “10 lekë për ne janë shumë”.
Por ka edhe qytetarë indiferent. “Për momentin kemi lekë dhe nuk na intereson”-thotë njëri prej tyre.
Me ironi shumë prej tyre u përgjigjën se çmimi duhet të rritet edhe më shumë, pasi ky popull mban ende.
“Ta bëjnë 200 biletën që të pasurohet shteti dhe bashkia, 50 lekë është shumë lirë,” tha njëri.
Një tjetër shtoi: “Ka qenë 40 lekë, tani është bërë 50 lekë. Për xhepin e shqiptarëve 50 lekë është shumë.”
“Pak e ka ky popull! Nuk ngrihet asnjë, të gjithë flenë gjumë dhe pajtohen me këtë gjest. Nafta është shtrenjtë, dhe për këtë fajin e ka qeveria. Po ta ulin naftën nuk ngrihet bileta,” tha një tjetër qytetar.
Deri më tani nuk është publikuar ndonjë vendim i i Këshillit Bashkiak të Kamzës për rritjen e çmimit të biletës, ndonëse një proces i tillë duhet të kalojë zyrtarisht përmes këtyre procedurave dhe të njoftohet publikisht.
Fakt është që qytetarët sot kanë blerë abonetë nga 1400 lekë dhe nga nesër bileta do kushtojë 50 lekë.
Rritja e çmimeve të transportit urban në Kamëz është e papranueshme në një kohë që ky shërbim nuk ka shtesa në intenerar, nuk ka kryer investime apo përmirsime në transport, apo për më tepër të ketë rritur rrogat e punonjësve të vet, por vetëm sepse privatit nuk i dalin llogaritë, thotë se janë rritur kostot. Dhe sigurisht mënyra më e mirë për të mbuluar kostot janë xhepat e qytetarëve.
Discussion about this post