Ditën e sotme ka filluar shtrimi i tapetit në stadiumin e Kukësit ‘Zeqir Ymeri’. Ky lajm është bërë publik nga vetë klubi Verilindor në një postim në rrjetet sociale, ku mbi të gjitha bën me dije se për tre javë pritet të zhvillohet ndeshja e parë aty.
Kukësi bën me dije se fusha do të jetë me bar natyral, ndërsa shtoi se krahas stadiumi gati do të jetë edhe fusha stërvitore.
“Sot ka nisur puna në stadiumin “Zeqir Ymeri” për shtrimin e tapetit. Procesi i shtrimit do të përfundojë brenda pak ditëve, teksa më pas do të duhen të paktën 3 javë për të zhvilluar ndeshjen e parë në stadiumin e ri. Ndryshe nga stadiumi i vjetër, fusha do të jetë me bar natyral ndërkohë që do të ketë edhe impiant ndriçimi dhe për herë të parë, ndeshjet në stadiumin e ri mund të luhen edhe natën. Krahas stadiumit, drejt përfundimit është edhe fusha stërvitore, e cila do t’i vijë në ndihmë ekipit për stërvitje por edhe skuadrave të moshave.”-shkruhet në njoftim.
Ndërsa rikujtojmë se skuadra Verilindore ka mbi dy sezone pa shtëpi për shkak të punimeve në stadiumin, që pritej të ishte inauguruar më 15 tetor./K.T/Gijotina.com
