Gjykata e Posaçme shtyu për në 21 maj seancën e radhës për informacionin 2-mujor të SPAK për hetimin ndaj Sali Berishës dhe Jamarbër Malltezin.
Avokatët i kanë kërkuar gjyqtares Irena Gjoka të heqë dorë nga procesi, duke i paraqitur edhe një kopje të njehsuar të vendimit të Gjykatës se Athinës të vitit 2004 për ndalimin e saj në zonën Shengen për 10 vite, si edhe gazetën greke “Protothema” që e ka publikuar.
Avokatët e Malltezit kanë kërkuar revokim të masës “arrest në shtëpi” për klientin e tyre. Gjykata nga ana e saj ka shtyrë seancën për t’i dhënë kohë avokatëve të Berishës për parashtrimet e tyre.
Që prej izolimit të tyre në shtëpi Sali Berisha e Jamarbër Malltezi kanë kërkuar zëvendësimin dhe shfuqizimin e kësaj mase në të tre shkallët e gjykimit, beteja që kanë rezultuar të dështuara.
“Ne kemi kërkuar që gjyqtarja Irena Gjoka të largohet nga kjo çështje. Ne do të bëjmë kërkesë për përjashtimin e gjyqtares Gjoka. Ne pretendojmë njëanshmëri nga gjyqtarja Irena Gjoka Jemi akuzuar që ne fabrikojmë fakte të paqena, për të intimiduar gjyqtaren, por nuk merr vendimet që themi ne, por ato që thotë SPAK. Berisha nuk është paraqitur sepse çështja e revokimit të masave së sigurisë është çështje proceduriale, kjo çështje nuk ka pasur asnjë provë që nga fillimi. Prokuroria nuk kanë një fabul të mekanizmit si është kryer kjo procedurë, kush korruptoi kë Gjykata nuk ka asnjë provë që të marrë asnjë masë sigurimi për zotin Berisha”, tha avokati Genc Gjokutaj, në një prononcim për gazetarët pas seancës.
Discussion about this post