Pas deklaratës së ministres së Arsimit, Evis Kushi për shtyrjen e vitit shkollor deri më 27 shtator, ka reaguar PD.
Deputetja e zgjedhur e PD, Oriola Pampuri shkruan në Faceboook, se ky vendim tregon se qeveria ka dështuar me mësimin online, ndërsa shton se kjo sjell hendeqe të tjera për nxënësit.
Sipas Pampurit, “detyra e qeverisë ishte të bënte mësim plotësues gjatë verës, kur infektimet ishin të pakta, por përkundrazi, vijojnë të veprojnë pa plan, duke lënë në mëshirë të fatit nxënësit dhe mësuesit”.
Kujtojmë se, viti shkollor ishte planifikuar të niste më 13 shtator, por ministrja Kushi u shpreh se data u shty për të shtuar javët e mësimit plotësues.
Postimi i plotë:
Shtyrja e vitit shkollor dëshmon se Ministria e Ç’arsimit ka dështuar me mësimin online dhe mësuesit ndihmës per familjet me femijet me aftësi te kufizuar.
Boshllëqet nga dështimi i mësimit online dhe mangësitë në mësues ndihmës nuk mund të zgjidhen duke shtyrë datën e nisjes së procesit mësimor, e cila ne vetvete nuk bën gjë tjetër veçse krijon hendeqe te tjera per nxenesit, sa i përket njohurive për vitin e ardhshëm mësimor. I gjithë ky ç’organizim vjen pikërisht nga paaftësia për të menaxhuar situatën përballë pandemisë, si me mësimin online, ashtu edhe me mësuesit ndihmës.
Detyra e qeverisë ishte të bënte mësim plotësues gjatë verës, kur infektimet ishin të pakta. Ndërsa shtyrja e tanishme e mësimit do të ketë efekte zinxhir për mësimdhënien, për familjet, në kushtet e rritjes së kurbës së infektimeve në vjeshtë. Asnjë mësim nuk nxorrën nga viti i shkuar, përkundrazi, vijojnë të veprojnë pa plan, duke lënë në mëshirë të fatit nxënësit dhe mësuesit.
