Ish-presidenti amerikan Jimmy Carter ka ndërruar jetë në moshën 100-vjeçare. Carter, i cili shërbeu si president i SHBA-së nga 1977 deri në 1981, vdiq në shtëpinë e tij në Plains, Georgia. Ai mbetet presidenti që ka jetuar më gjatë në historinë e SHBA-së. Liderët politikë, përfshirë presidentin Joe Biden dhe ish-presidentin Donald Trump, i kanë bërë homazhe, duke e përshkruar si një njeri të përkushtuar, me parime të forta dhe një angazhim të jashtëzakonshëm për drejtësinë sociale dhe paqen.
Biden e nderoi Carterin si një njeri të besueshëm dhe të përulur, ndërsa Trump tha se të gjithë amerikanët i detyrohen atij një borxh mirënjohjeje. Për nder të tij, Biden shpalli një ditë zie kombëtare më 9 janar dhe urdhëroi që flamujt të jenë në gjysmështizë për 30 ditë.
Përveç udhëheqësve amerikanë, edhe liderë ndërkombëtarë kanë nderuar Carterin. Mbreti Charles III dhe Kryeministri i Britanisë Keir Starmer e lavdëruan përkushtimin e tij ndaj paqes dhe drejtësisë sociale, ndërsa presidenti ukrainas Volodymyr Zelensky theksoi mbështetjen e tij për lirinë e Ukrainës.
Presidenti francez Emmanuel Macron tha se ai kishte qenë një “avokat i palëkundur për të drejtat e më të cenuarve dhe ka luftuar pa u lodhur për paqen”.
Kryeministri kanadez, Justin Trudeau, ka shprehur ngushëllimet e tij të thella. Në një mesazh, Trudeau theksoi trashëgiminë e Carter-it, duke e përshkruar atë si një njeri të dhembshur, të përkushtuar dhe të ndjeshëm, i cili shërbeu me bujari dhe pasion si në SHBA ashtu edhe në mbarë botën.
Kancelari gjerman Olaf Scholz ka shprehur ngushëllimet e tij për humbjen e ish-presidentit amerikan Jimmy Carter, duke e përshkruar atë si një “luftëtar të përkushtuar për demokracinë” dhe një “ndërmjetës të madh për paqen” në Lindjen e Mesme dhe për të drejtat e njeriut.
Discussion about this post