Ish-presidenti uruguajan Jose ”Pepe” Mujica, ka vdekur në moshën 89-vjeçare pas një beteje me kancerin e ezofagut.
Ai mbylli sytë duke i dhënë fund një udhëtimi që e bëri atë një legjendë të së majtës globale.
“Jam i vetëdijshëm se i përkas një brezi që po largohet, që po thotë lamtumirë. Lufta vazhdon dhe duhet të mbijetojë”, kishte thënë udhëheqësi në një nga aktet e tij të fundit politike dhe duke iu referuar trashëgimisë së tij.
I lindur në Montevideo më 20 maj 1935, Jose Alberto Mujica Cordano, siç njihej, u bë anëtar i lëvizjes guerile të krahut të majtë Lëvizja Kombëtare Çlirimtare – Tupamaros në vitet 1960 dhe ishte një figurë progresive me rëndësi botërore.
Koha e tij si president i Uruguajit u shënua nga pushtimi i të drejtave civile, siç është dekriminalizimi i abortit, legalizimi i martesave të së njëjtës gjini.
I njohur për jetën e tij larg luksit, Mujica jetonte në një shtëpi modeste fshati dhe ngiste një ”Beetle” të vitit 1987.
Ishte pikërisht për shkak të stilit të tij të jetesës së ashpër që ai u quajt “presidenti më i varfër në botë”.
Një kundërshtar i vendosur i korrupsionit – një plagë që ka goditur shumë presidentë të Amerikës Latine – dhe mjaftueshëm i ndershëm sa për të dhuruar 90% të pagës së tij presidenciale për organizatat joqeveritare që ndihmojnë më të pafavorizuarit, në vitin 2014 Pepe (epiteti i tij) e bëri Uruguajin e tij vendin e parë në botë që legalizoi marijuanën nën kontrollin e shtetit, me qëllim që t’i privonte trafikut të drogës nga një biznes që vlente midis 30 dhe 40 milionë dollarëve në vit.
Gjatë diktaturës së fundit ushtarake në Uruguaj, udhëheqësi kaloi mbi 10 vjet në burg, shumë prej të cilave në izolim. Por, ai doli prej saj pa mëri, duke mishëruar një model të rrallë të një politikani etik, të përulur dhe thellësisht njerëzor, gjë që e bëri të vlerësohej, për aftësinë e tij për dialog, nga një pjesë e madhe e votuesve të vendit të tij, të cilët e zgjodhën atë si president nga viti 2010 deri në vitin 2015.
Ai që njoftoi vdekjen e Mujicas ishte presidenti aktual uruguajan, Yamandu Orsi, të cilin e konsideronte trashëgimtar të tij të dukshëm.
“Me hidhërim të thellë njoftojmë ndarjen nga jeta të shokut tonë Pepe Mujica, president, aktivist, referencë dhe udhëheqës. Do të na mungosh shumë, i dashur. Faleminderit për gjithçka që na dhe dhe për dashurinë tënde të thellë për popullin tënd”, tha Orsi, ndërsa nga e gjithë Amerika Latine, me lajmin e vdekjes së tij, mbërritën një lumë mesazhesh ngushëllimi.
Discussion about this post