Liverpool ka njoftuar vdekjen e ish-mesfushorit të tyre të mirënjohur, Peter Cormack. Cormack, një lojtar i rëndësishëm për klubin gjatë periudhës së tij katërvjeçare nga viti 1972 deri më 1976, ndërroi jetë të enjten mbrëma në moshën 78-vjeçare, siç konfirmoi klubi anglez.
“Jemi thellësisht të pikëlluar për ndarjen nga jeta të ish-mesfushorit Peter Cormack, 78 vjeç. Pusho në paqe, Peter”, thuhet në njoftimin e Liverpoolit.
Ai debutoi për Liverpoolin në shtator të vitit 1972 kundër Derby County dhe vetëm një javë më vonë shënoi golin e tij të parë në një ndeshje ndaj Wolverhampton Wanderers në Anfield. Gjatë sezonit të tij të parë, ai shpejt fitoi zemrat e tifozëve të Reds, sidomos me golin e tij fitues në derbin e Merseyside në tetor.
Në sezonin 1972-73, Peter Cormack luajti 52 ndeshje në të gjitha garat dhe shënoi 10 gola, duke ndihmuar Liverpoolin të fitojë kampionatin e Kategorisë së Parë për herë të parë që nga viti 1965-66. Ai gjithashtu luajti një rol kyç në fitoren e parë të Kupës UEFA për Liverpoolin, duke luajtur çdo minutë të finales kundër Borussia Monchengladbach.
Sezoni pasues i 1973-74 ishte po aq i suksesshëm për të, duke regjistruar 57 ndeshje dhe 11 gola. Ai dha kontributin e tij në suksesin e Liverpoolit në FA Cup, me një fitore të madhe në finale kundër Newcastle United në Wembley.
Cormack mbetet një figurë e dashur në historinë e Liverpoolit, duke qenë pjesë e sukseseve të fundit të Bill Shankly në drejtimin e klubit.
Discussion about this post