Një ditë pas mbledhjes së grupit parlamentar të Partisë Demokratike, ku shumica e deputetëve i kërkoi dorëheqjen, Lulzim Basha ka bërë lëvizjen e radhës. Mësohet se, në orën 17:00 të pasdites së sotme, kreu i PD ka thirrur në takimin, kolegjin e kryetarëve, e thënë ndryshe kryetarët e degëve të kësaj force politike.
Mbledhja e djeshme ka vazhduar deri pas mesnate, ku për herë të parë, edhe mbështetësit e tij më të afërt i dolën kundër. Të parët që kërkuan që Basha të mbante përgjegjësi për zgjedhjet e 6 Marsit ishin nënkryetarët Agron Gjekmarkaj dhe Grida Duma, madje e bënë këtë dhe publikisht jashtë dyerve të blinduara të Partisë Demokratike.
Gjatë mbledhjes, Basha sërish nuk ka marrë përgjegjësi për humbjen, duke i konsideruar zgjedhjet e 6 Marsit, si një kurth për partinë që drejton, mendim i cili iu mbështet dhe nga deputetët Orjola Pampuri, Arbi Agalliu, Flamur Hoxha dhe Kreshnik Çollaku.
Kujtojmë se në zgjedhjet e 6 marsit, PD nuk fitoi asnjë bashki, madje rezultati ishte më tronditës, pasi për herë të parë në 30 vite pluralizëm, doli forcë e tretë.
Discussion about this post