Zyrtarët duhet ta mbajnë nën fre nxitjen që kanë për të abuzuar me fondet, sidomos në rastin kur objekti është ushqimi i fëmijëve dhe i nxënësve. Nëse kryetarja e Bashkisë Durrës, Emiriana Sako, do të harronte shifrën e madhe që luhet pas këtij tenderi dhe do të ndërhynte, Qendra Ekonomike e Arsimit në Durrës nuk do ta zvarriste këtë furnizim. Në të kundërt, tenderi që ka zhvilluar stafi i Sakos është abuziv dhe plot me shkelje duke çuar në denoncime nga operatorët pjesëmarrës.
Bëhet fjalë për prokurimin me objekt “Blerje ushqime për QEA” (Qendra Ekonomik e Arsimit në Durrës) dhe për të furnizuar me ushqime kopshte publike apo mensa për shkollat profesionale në Durrës, ku do të shpenzohen 400 milionë lekë. Janë vënë në dispozicion një shumë e madhe parash dhe duhet përgjegjësi që të garantohen ushqimet si makarona, djathë, vezë, mish, sallam, qumësht, perime, fruta, drithëra.
Por abuzimi që shoqëron procesin e prokurimit krijon një firo të fondit që përdoret dhe lë dyshime për cilësinë.
Denoncimi
ARGENT DACI, i cili operon si person fizik e ka ankimuar procedurën. Në fakt Daci nuk ka hallin që të zhvillohet një garë e rregullt dhe kopshtet të furnizohen sa më parë më ushqime, por nuk pranon dot faktin që këtë herë nuk është zgjedhur për bashkëpunim nga kryetarja Sako, e cila gjithmonë ia ka dhënë tenderat në tavolinë.
Në ankesën e bërë shohim se ai kërkon që tenderi të ndahet në disa lote pasi ka produkte të ndryshme, kjo rrjedhimisht do të shtonte edhe shpenzimet për blerjen e ushqimeve.
“Në këtë procedurë prokurimi kërkojmë ndryshimin e dokumenteve standarde të tenderit pasi bien në kundërshtim të hapur me legjislacionin për procedurat e prokurimit konkretisht kërkojmë që kjo procedurë të ndahet me lote”, thuhet në ankesë.
Epo Sako ka plan që këto 400 milionë lekë të mos i ndajë në lote, por t’ia bëjë paketë dhuratë firmës që ka parashikuar për kontratën. Gjithsesi për këtë duhet të presim dhe pak që KPP të marrë vendimin dhe Bashkia të shpall fituesin.
Tenderat e ushqimit përfitohen nga të njëjtët personazhe që ushqejnë korrupsionin e zyrtarëve me fondet. Sakaq, e dimë që Daci, personi që denoncon, njihet shumë edhe në Bashkinë Tiranë dhe atë Kamëz për tender abuzive me ushqimet. Një muaj më pari ai përfitoi 116 milionë lekë pa garë për ushqimin e çerdheve në Kamzë. Sigurisht janë miq të vjetër me krybashkiakun Rakip Suli. Katër vite më parë Suli e ka mbrojtur Dacin, kur ky i fundit u përballë me protestat banorëve që kundërshtonin ndërtimin e një thertoreje në Laknas.
Fitoi tenderin e mishit të burgjeve duke pasur vetëm 10 pula
Ndërkaq, Daci ka një mbështetje të fortë nga Jonaid Myzyri që drejton Komisionin e Prokurimit Publik (KPP). Një nga vendimet famëkeqe në favor të Dacit ka qenë në vitin 2022 kur fitoi tenderin e furnizimit me mish të burgjeve, kur në inventar kishte vetëm 10 pula.
Në vitin 2022, Agjencia e Blerjeve të Përqendruara në varësi të Ministrisë së Brendshme për nevoja të Drejtorisë së Përgjithshme të Burgjeve kishte shpallur procedurën e prokurimit “Blerje mishi dhe nënproduktet e tij” me një fond limit prej 314.572.580 lekësh.
Kjo agjenci, pas vlerësimit të ofertave, ka shpallur fitues ofertën më të ulët, atë të kompanisë “Olta Sharra” me ofertë rreth 246 milionë Lekë.
Skandali i këtij tenderi fillon në momentin, që njëri nga operatorët pjesëmarrës, Argent Daci, ankimoi vendimin.
Komisioni i Prokurimit Publik anuloi fituesin e parë dhe shpalli fitues Argent Dacin, me një ofertë 310 mijë dollarë më të lartë, se fituesja e parë.
Komisioni përbëhej nga kryetar Jonaid Myzyri, nënkryetar Fiorent Zguro dhe anëtarë Kreshnik Tërnova dhe Anila Malaj. Ky komision ka vendosur të pranojë ankesën e paraqitur nga operatori ekonomik Argent Daci, Po ashtu, Autoriteti kontraktor të anulojë vendimin e KVO mbi skualifikimin e tij dhe të korrigjojë shkeljet e konstatuara duke e kualifikuar operatorin ekonomik fitues. Së fundi, Autoriteti kontraktor të anulojë vendimin e KVO mbi kualifikimin ekonomik Olta Sharra duke e skualifikuar këtë operator ekonomik.
Operatori Argent Daci, sipas dokumenteve zyrtare, kishte vetëm 10 shpendë. Pra, një firmë me vetëm 10 pula në inventar dhe jep ofertën më të lartë shpallet fituese e tenderit, për të furnizuar me mish burgjet e vendit për dy vjet e me një shumë parash 2.7 miliardë lekë të vjetra.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post