Si dështuan shërbimet sekrete izraelite të parandalonin sulmin e Hamas

“Nuk e kemi idenë se si mund të ketë ndodhur kjo”. Ky ishte reagimi i parë që dhanë zyrtarët izraelitë pas sulmit në befasi të Hamasit.

Pavarësisht të gjitha burimeve të mëdha të inteligjencës izraelite, sulmi nuk u parandalua.

Dhjetra persona të armatosur palestinezë ishin në gjendje të kalonin kufirin e fortifikuar mes Izraelit dhe Rripit të Gazës, ndërsa mijëra raketa u hodhën nga Gaza në Izrael.

BBC e cilëson si një dështim të Shin Bet, inteligjencës së brendshme izraelite, Mosadit, agjencisë së saj të jashtme të spiunazhit, si dhe të gjitha aseteve të Forcave të Mbrojtjes të Izraelit.

Izraeli ka pa dyshim shërbimet më të mirëfinancuara të inteligjencës në Lindjen e Mesme dhe një nga më të mirët në rang global.

Mosad ka informatorë dhe agjentë brenda grupeve militante palestineze, në Liban, Siri dhe gjetkë.

Në të kaluarën, Izraeli ka kryer atentate në kohën e duhur ndaj liderëve militantë, duke i ditur nga afër të gjitha lëvizjet e tyre.

Ndonjëherë këto janë realizuar përmes sulmeve me dron, pasi agjentët në terren kanë vendosur lokalizuas në mjetet e kundërshtarëve.

Në terren, përgjatë gardhit midis Gazës dhe Izraelit ka kamera, sensorë të lëvizjes në tokë dhe patrulla të rregullta të ushtrisë.

Gardhi me tela me gjemba supozohet të ketë qenë një “pengesë e pakalueshme” për të parandaluar pikërisht llojin e infiltrimit që ka ndodhur në këtë sulm. /Euronews/