Fatmir Mediu dhe Agron Duka, drejtues të dy partive opozitare, përkatësisht PR-së dhe PAA-së, shpjeguan mbrëmjen e sotme, propozimin e tyre lidhur me krijimin e një federate opozitare, e cila shihet si rruga e vetme për bashkimin opozitar.
Mediu dhe Duka në emisionin “Open” u shprehën se kjo është një inisiativë që synon daljen e opozitës me një formacion të përbashkët në zgjedhje, dhe që drejtimi i saj do të jetë kolegjial.
Duka tha se bazuar te propozimi federata nuk do ketë një kryetar, por 3 koordinatorë, që do të zgjidhen me zgjedhje.
Ndërsa Mediu tha se jo më kot është propozuar që të jenë 3 deputetë.
Sipas dy politikanëve të opozitës, përmes federatës synohet jo thjesht bashkimi i dy individëve, Sali Berishës dhe Lulzim Bashës, por të gjithë faktorëve opozitarë, peshës së tyre në zgjedhje, që e tregoi edhe procesi i fundit zgjedhor në 14 maj.
Duka tha se ajo që është e rëndësishme në këtë process është që mos mbetemi peng të emrave, kë preferon njëra palë dhe kë pala tjetër.
“Nuk mund të hyjmë në diskutime emrash, ne duhet të çojmë përpara këtë proces, mbi bazën e ideve dhe platformave për të maksimalizuar forcën e opozitës”, tha Duka.
Duka u shpreh se “interesi ndonjëherë bashkon edhe armiq” dhe se në këtë mënyrë mund të shkohet drejt pushtetit.
Ai u shpreh se megjithatë është skeptik për realizimin e këtij projekti, i cili sipas tij do të shërbente për krijimin e një fryme të përbashkët në opozitë.
“Nëse ne bashkohemi zgjidhet problemi i kodit zgjedhor. Duhet të marrim të drejtat kushtetuese që na takojnë, të paktën duhet të kemi kohezion dhe të krijojmë një frymë të përbashkët.
Ndonjëherë interesi bashkon edhe armiq, kështu mund të shkohet drejt pushtetit. Megjithatë unë jam skeptik për realizimin e këtij projekti”, tha Duka mes të tjerash.
Discussion about this post