Hetuesit po gjurmojnë lëvizjet e fundit të Aleksandër Sadikajt, i cili humbi jetën ditën e shtunë gjatë një atentati në afërsi të rrethrrotullimit të TEG, në Tiranë. Ekspertët e kriminalistikës dyshojnë se ekzekutorët e atentatit përveçse kanë ndjekur çdo lëvizje të Aleksandër Sadikajt, kanë dërguar dhe mesazh tek persona të tjerë me të cilat mund të ishte i lidhur, i mbrojtur apo edhe mund të ketë bashkëpunuar viktima.
Prokuroria ka mundur të marrë disa dëshmi të njerëzve të njohur të viktimës, të cilët kanë pasur kontakt të përditshëm me Sadikajn. Gjatë rrëfimit, është mësuar se i riu jepte para me fajde, se mjetin e kishte të blerë, po që nuk ishte kaluar ende në pronësinë e tij, se një shok i tij i kishte borxh një sasi të madhe parash dhe që kishte kohë që nuk ia jepte, se nuk kishte ku t’i merrte, se Aleksandri kishte qenë në burg në Greqi, se ai kishte pasur një sherr edhe në Memaliaj, se në shtëpi mbante edhe antiplumb dhe armë, se ditën e ekzekutimit ai kishte lënë të drekonte me të dashurën në Tiranë, por që nuk i dihet se për ku ishte nisur.
Po ashtu është mësuar se ai kishte vërejtur se në mjetin e tij ishte edhe një ndërhyrje në pjesën e kofanos, por që nuk ia kishte vënë veshin, por e kishte mbyllur vetë. Policia ka dyshime se bomba ka qenë e vënë që natën përpara, por mbase autorët nuk kanë dashur të dëmtojnë vajzën që ka qenë me të, duke e pritur deri në momentin që ai të ishte i vetëm. Por prokuroria dhe ekspertët, veç së shkuarës së tij, mësohet se po hetojnë edhe familjarët dhe miqtë e afërt për të verifikuar nëse ekzistojnë dyshime që krimi i rëndë të ketë shkaqe që janë jashtë Sadikajt, por që goditën pikërisht të riun.
Discussion about this post