Korrupsioni dhe burokracitë në institucione janë zhdukur, kjo është kryefjala e kryeministrit Edi Rama, i cili pretendon se digjitalizimi, i ka bërë institucionet dhe administratën më korrekte dhe të pakorruptueshme.
“Mirëmëngjes dhe me një tjetër hap në Revolucionin Digjital për rritjen e transparencës, barazinë e konkurrencës dhe sigurinë e sipërmarrjes, duke thelluar më tej luftën kundër korrupsionit, ju uroj një javë të mbarë”, shkruan Rama në rrjete sociale.
Por për qytetarët asgjë nuk ka ndryshuar, me anë të digjitalizimit nuk kryejnë punët dhe kur përballen drejtpërdrejt me institucionet, me administratën njëherësh përballen edhe me korrupsionin.
Ata i kundërpërgjigjen kryeministrit Edi Rama, duke i thënë se administrata është e kalbur dhe punonjësit janë të papërgjegjshëm. Në rrjetin social facebook, në komente nuk mungojnë reagimet e ashpra dhe “kryqëzimi” që këta të fundit i bëjnë kryeministrit.
“Administrata është e kalbur, nuk mbarojnë punët as tek e- albani. Aplikojmë, shpenzojmë edhe pse blohen agallarët e hipotekave nuk sjellin përgjigje. Kur kërkon sqarim, ik në gjyq, thonë. Mizerje, sidomos ASHK, Tirana, Veri”, denoncon një qytetar.
“More si nuk të vjen turp çdo ditë me kënaq veten, duke postuar ca mrroklla që vetëm një kryeministri nuk i shkojnë, hapi pak syte se jeni vetëm ju kryetarët apo padronët që po e pengoni vendin të përparojë, a thua se vetëm ju jeni më të mirët”, shkruan një qytetar.
Një tjetër qytetar përveçse korrupsionit, denoncon punësimet partiake dhe sipas tij, për shkak të këtyre fenomeve po detyrohen të largohen nga Shqipëria.
Kjo nuk është hera e para që qytetarët e vënë me shpatulla pas muri kryeministrin Rama në postimet e tij në rrjetin social Facebook.
