Java e kaluar u mbyll me një sukses stratosferik të kompanive pranë qeverisë. Dhjetra miliardë lekë publike u shpërndanë në tendera të dyshimtë për shoqëritë private të miqve personal të kryeministrit Edi Rama. Përfshirë Sadri Abazin, Alban Eftimi, Salillari e të tjerë. Në krye të listës së shpërndarësve të miliardave për këtë javë qëndron kryetari i Bashkisë së Tiranës, Erion Veliaj. I pasuar nga homologu i tij në krye të bashkisë së falimentuar të Kavajës, Redian Krali.
Projektimi i kampusit universitar
Kompania “Atelier 4” e vëllezërve Alban dhe Olsi Eftimi, të njohur për miqësinë e tyre të hershme me kryeministrin Rama, është në krye të listës së operatorëve të kualifikuar për tenderin me vlerë rreth 4 milionë euro për studimin dhe projektimin e kampusit universitar Tiranë dhe ndërtimin e godinës së re të Universitetit të Arteve.
Tenderi është shpallur nga Bashkia e Tiranës në Gusht të këtij viti dhe në dispozicion të kompanive pjesëmarrëse janë vendosur plot 4.6 miliardë lekë të vjetra.
Kjo procedurë u shpall edhe më herët, në fund të vitit 2021. Por, Bashkia e Erion Veliajt e anuloi procedurën në atë kohë, nën justifikimin se nuk kishte aftësi paguese.
Tashmë që tenderi masiv u rikthye sërish, duket se fati po i ndrit Alban Eftimiut. Procedura është me dy faza dhe fituesi përfundimtar duhet të presë edhe pak kohë. Por duket se gjithçka është përgatitur që fondi 4 milionë euro të përfundojë në llogaritë e “Atelier 4”.
Asfalti elektoral
Bashkia e Veliajt ka mbyllur gjithashtu këtë javë një tjetër tender gjigand, me fond plot 10 miliardë lekë të vjetra, ose rreth 9 milionë euro. Tenderi ka si objekt asfaltimin e rrugicave të ndryshme në Tiranë, me qëllim të dukshëm elektoral. Fituesit e këtij tenderi janë disa kompani, ku bien në sy të paktën dy, të cilat kanë probleme të tjera këto kohët e fundit. Sipas dokumentave zyrtarë, rezulton se pjesë e fituesve të tortës 10 miliardë lekë të Veliajt janë shoqëritë “Salillari” dhe “Arb Trans 2010”.
Të dyja kompanitë u kapën në flagrancë nga ministrat e qeverisë “Rama” duke ndërtuar kate pa leje. Në shtator të këtij viti, Rama nxori në terren zëvendësen e tij, Belinda Balluku dhe Ministrin e Brendshëm, Bledi Çuçi, për të gjetur pallatet me kate pa leje.
Në “rrjetën” e ministrave ranë një pallat i Pëllumb Salillarit në zonën e Farkës dhe një godinë e ndërtuar nga kompania e zyrtarit socialist, Arben Maloku, “Arb Trans”, pranë qendrës së Tiranës, në rrugën “Myslym Shyri”. Dy kompanitë duhet të ishin para drejtësisë për veprën penale të ndërtimit të paligjshëm. Me qëllime fitimi, që parashikon deri në 8 vjet burgim. Por, as qeveria dhe as drejtësia nuk i pengon dy kompanitë që të shpallen fitues në tenderin 10 miliardë lekë të Veliajt.
Plehrat e Kavajës
Kompania e familjes së ish-deputetit socialist, Sadri Abazi, ka fituar “me forcë” një tender me vlerë 5.5 miliardë lekë. Ose rreth 5 milionë euro, për pastrimin e qytetit të Kavajës për 5 vitet e ardhshme. Administrata e drejtuar nga Redian Krali vendosi të bënte një tender shumë-vjeçar, megjithëse Bashkia është në krizë të thellë financiare.
Nga të dhënat zyrtare rezulton se shoqëria “Alko Impeks General Construction” ka paraqitur ofertën më të lartë në këtë tender. Konkretisht, 5.49 miliardë lekë të vjetra, ose vetëm 10 milionë lekë të vjetra më pak se sa fondi limit.
Kompania tjetër në garë kishte paraqitur një ofertë me vlerë më pak se 1 miliardë lekë të vjetra se sa fondi limit. Por, kryebashkiaku Krali ishte i vendosur që fondin gjigand ta dorëzonte tek llogaritë e “Alko Impeks”.
Konkurrenti tjetër e ankimoi vendimin pranë Komisionit të Prokurimit Publik (KPP). Por, edhe ky institucion, që emrin e ka të pavarur, por që anëtarët e tij janë të zgjedhur të gjithë nga maxhoranca, vendosën që tenderin 5 milionë euro ta dorëzonin tek familjarët e Sadri Abazit. Pavarësisht se kjo do t’u rëndojë xhepave të kavajasve të varfër.
Tenderët e pastrimit, Kapri me nipin e Sadri Abazit, kundër Mirit
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post