Zbulohen të dhëna të tjera lidhur me sjelljen e Dan Hutrës, autori i masakrës së Paskuqanit. Edhe pse ishte i burgosur për dhunë në familje sjellja e tij në burg ka treguar se Dan Hutra nuk ishte rehabilituar, ndërsa nuk kishte krijuar besueshmëri për një qëndrim korrekt edhe jashtë institucionit. Sipas dokumentit të siguruar nga A2CNN, i cili flet për sjelljen 6-mujore të 40-vjeçarit në burgun “Jordan Misja”, tregohet qartazi se vrasësi i tri grave dhe i plagosjes së tre të tjerave ka qenë problematik gjatë qëndrimit në burg.
Nga të dhënat e nxjerra nga grupi i 5 ekspertëve, të cilët kanë vlerësuar periudhën qershor deri në fund të dhjetorit të vitit 2022, shkruhet se Hutra ka pasur probleme dhe në marrëdhënie me bashkëvuajtësit e tjerë në burg. Ndaj tyre ka përdorur fjalë fyese, e si pasojë është dënuar pasi ndaj tij janë marrë masa disiplinore.
Po ashtu, sipas komisionit të vlerësimit kur 40-vjeçarit i mbeteshin dhe 2 muaj dënim, me sjelljen dhe qëndrimin e tij brenda ambienteve të burgut, nuk krijonte besueshmëri për një qëndrim korrekt edhe jashtë institucionit. Kjo pasi anëtarët e komisionit dolën në konkluzionin se Dan Hutra nuk ka respektuar rregullat e burgut ndaj dhe si pasojë është vlerësuar negativisht.
Si ndodhi masakra më 1 mars?
Dan Hutra plagosi fillimisht 40-vjeçaren Marjana Gurakuqi në zonën e Astirit, pasi ajo nuk pranoi t’i jepte një shumë parash që ai i kërkoi. Më pas, me makinën që kishte marrë me qira, shkoi në Paskuqan, aty ku jetonte familja e ish-partneres së tij Elena Hysa. Hapi zjarr duke vrarë motrën dhe kunatën e saj, Mevlute Hysa dhe Hasime Dafku si dhe plagosi vetë Elenën e nënën e saj, Kujtime. Më pas shkoi në Kamëz, në shtëpinë e Etleva Kurtit, duke e qëlluar edhe këtë të fundit për vdekje.
Arratia e Dan Hutrës mori fund pas 7 orëve kërkime. Ai u arrestua nga policia në zonën e Sharrës ku kishte shkuar për të ekzekutuar një person të katërt, Rrahman Sela, por që nuk e realizoi dot. 40-vjeçari është dënuar më parë për përdhunim, vrasje e dhunë në familje. Në gjyq, ai nuk ka shprehur asnjë lloj pendese për krimet e kryera.
Discussion about this post