Ish-deputeti i PS-së, Jurgis Çyrbja akuzohet se ka ndihmuar personazhin e krimit Altin Hajri, pasi ky i fundit u shpall në kërkim për rrëmbimin e zhdukjen e Jan Prengës.
Ndaj Jurgis Çyrbjas, i cili u arrestua mbrëmjen e së dielës (20 Tetor) në Durrës, SPAK ka ngritur akuzat për “Korrupsioni altiv në zgjedhje”, “Përkrahja e autorit të krimit”, si dhe “Tregëtimi i sekretit shtetëror nga shtetasit”.
Ish-deputeti i PS-së është “tradhtuar” nga bisedat në aplikacionin SkyEcc ku ka komunikuar me personazhin e njohur të botës së krimit dhe të arrestuarin e dytë, Ahmet Masha, ku këta dy të fundit e kanë ndihmuar të futet në listën e sigurtë për deputet në zgjedhjet parlamentare 2020.
Kush është Edmond Koçi
Gjithashtu në komunikime përmendet edhe Edmond Koçi, i njohur si Mond Çekiçi, ish-anëtar i bandës së Durrësit, i cili u ekzekutua me armë zjarri në 20 mars 2021.
Autorët kanë qenë dy, të kamufluar me veshje ushtarake dhe të maskuar me shall e kapuç. Makina e autorëve një tip “Benz ” i zi kishte bllokuar rrugën në pritjet të arritjes së makinës me të cilën udhëton te Çekiçi, të cilin e kanë ekzekutuar me breshëri të shtënash, një skenë që ka zgjatur rreth 20-30 sekonda.
“Mond Çekiçi”, konsiderohej nga policia e Durrësit si person me rrezikshmëri, pasi jo vetëm që ishte pjesë përbërëse e një klani kriminal në Durrës, por ai rezultonte të jetë dënuar disa herë për akuzën e mbajtjes pa lejë të armëve dhe kundërshtimit të forcave të policisë. Në muajin maj 2009 Edmond Koçi, u dënua me 2 vite burgim për akuzën e “Mbajtjes pa lejë të armëve”.
Kush është Altin Hajri
Ai akuzohet për rrëmbimin dhe zhdukjen e Jan Prengës në janar të 2020.
Altin Hajri, një nga anëtarët e grupit kriminal që vepronte në zonën e Shijakut po gjykohet ne mungesë pasi nuk është bërë e mundur gjetja e tij.
Gjithashtu ishte shpallur në kërkim ndërkombëtar nga autoritetet italiane, i dyshuar si koka e një rrjeti të trafikut të drogës nga Afganistani në Itali. Por autoritetet italiane pushuan hetimin ndaj tij, duke hequr emrin e tij nga listat e të kërkuarve.
Në Shqipëri, Altin Hajrit iu bllokuan pasuri me vlerë rreth 10 milionë euro.
Në tetor 2015 në një operacion të përbashkët të policisë italiane dhe shqiptare të koduar “Enigma”, u arrestuan 16 persona dhe u sekuestruan më shumë se 450 kilogramë drogë e papërpunuar, 325 kilogramë marijuanë, 206 kilogramë heroinë.
Të dyshuar si pjesë e këtij trafiku, në atë kohë u arrestuan në qytetin e Durrësit edhe djali i xhaxhait të Altin Hajrit, dhe një kushëri tjetër i tij, Hajri Balla dhe Fortuz Hajri, 53 dhe 24 vjeç, të dy banues në Shijak. Arrestimi i tyre u bë në bazë të një urdhri ndalimi të gjykatës së Venecias së datës 15 gusht të vitit 2015.
Ata akuzoheshin në atë kohë për veprën penale të “trafikimit të lëndëve narkotike”, ndërsa i kishin shpëtuar operacionit të policisë në vitin 2015, bashkë me Altin Hajrin.
Kush është Ahmet Masha
Ahmet Masha është personi i cili u arrestua mbrëmjen e kësaj të diele (20 tetor) në Durrës, bashkë me ish-deputetin e PS-së, Jurgis Çyrbja.
Masha mësohet se është një person i njohur për autoritetet shqiptare dhe me precedentë penal.
Ai është arrestuar dhe dënuar nga Gjykata e Durrësit në dhjetor të vitit 2013 për kontrabandë mallrash në portin e Durrës.
Masha bashkë me një grup personash të tjerë, u arrestuan për kontrabandë nafte dhe alkooli nga Mali i Zi në Durrës, e cila kryhej nëpërmjet tri anijeve të peshkimit, pronari i njërës prej të cilave ishte vetë ai.
Sipas Policisë, tre pronarët e mjeteve të peshkimit “Rovana”, “Iliria” dhe “Ernaldo” merrnin naftë e pije alkoolike në Malin e Zi dhe i sillnin në Portin e Durrësit për t’i hedhur në treg me sasi të vogla.
Sektori Kundër Krimit Ekonomik Durrës zbuloi asokohe aktivitetin që kryhej nga tre pronarët e peshkarexhave, Zyhra Vokshi, Ahmet Masha dhe Ardian Cani, duke u finalizuar me sekuestrimin e 11 automjeteve, 3 mijë litrave naftë, 10 cisternave plastike, si dhe 110 arkave me verë.
Gjatë periudhës së hetimit është provuar se janë kontrabanduar rreth 80 mijë litra naftë. Nga grupi hetimor mësohet se nafta sigurohej në portet e Malit të Zi nga tre peshkarexha, të cilat mbushnin në kapacitet maksimal depozitat e tyre, 20 mijë litra naftë secila.
Pas kësaj anijet ankoroheshin në Portin e Durrësit dhe gjatë ditëve që qëndronin aty nafta nxirrej në sasi të vogla nëpërmjet automjeteve të ndryshme, të përshtatura me cisterna dhe depozita në brendësi të tyre, me qëllim shmangien e detyrimit doganor.
Më pas karburanti i blerë në Malin e Zi trafikohej në pikat e vogla të shitjes së karburantit në Shijak dhe Durrës.
Discussion about this post