Sociologu Gezim Tushi ka analizuar fenomenin e bullizimit tek fëmijët dhe tek të rriturit duke treguar dhe mënyrat sesi mund të dallojmë një person të bullizuar. Ai u shpreh se fëmijët e bullizuar priren të mbyllen në vetvete dhe të shmangin vajtjen në shkollë për shkak të ngacmimeve që mund të marrin nga bashkëmoshatarët e tyre.
“Fëmijët e bullizuar, që rrezikohen nga ngacmimet shfaqin shenja. Veprimet duhet të jenë të zgjuara, që të kuptojnë një fëmijë që mbyllet në vetvete, që ka qejf të rri në dhomën e tij, që qan, që nuk ka oreks, që është i mërzitur, që nuk do të shkojë në shkollë. Këto janë shenja që tregojnë që fëmija është i bullizuar, dhe kjo do të thotë se duhet të ketë veprim të menjëhershëm nga prindërit në raport me shkollën.”-tha ai.
Në një intervistë për Ora Neës, sociologu Tushi tha se bullizimi është bërë shkak për shumë situata fatkeqësie. Ai theksoi se bullizimi në një ambjent pune, mes të rriturve, është më seriozi.
“Bullizmi, ngacmimi i fëmijëve me njëri-tjetrin është bërë një dukuri shumë e zgjeruar, ngacmim për shkak të ngjyrës së lëkurës, për shkak të defekteve të lindura, për shkak ë fuqisë fizike, dhe shfaqen të gjitha format e ngacmimit verbal, seksual. Këto forma të bullizmit janë shumë të rrezikshme, pasi kemi parë herë pas here që na kanë ndodhur fatkeqësi shumë të mëdha. Kemi parë fëmijë të bullizuar që nuk e kanë gjetur dot rrugën e duhur e më pas kanë bërë veprime të gabuar, duke bërë gjëra të llahtarshme ndaj vetes së tyre. Kemi bullizëm në vendet e punës me të rriturit, kjo duhet vlerësuar seriozisht. Ngacmimet në rrjetet sociale janë shumë të mëdha, dhe pikërisht këtu duhet një lloj vigjilence, e prindërve për t’i parë fëmijët.”-theksoi Tushi.
Discussion about this post